| 雅各 |
|---|
 |
| 原文名 | יַעֲקֹב |
|---|
| 父母 | 以撒（父）同利百加（母） |
|---|
雅各（希伯來文：יַעֲקֹב；英文：Jacob），又叫雅各伯，係希伯來聖經提到嘅一位族長，廣泛被視為以色列人嘅祖先。佢係以撒同利百加生嘅仔，以掃嘅細佬，亦即係話佢係亞伯拉罕嘅其中一個孫。一般認為，雅各冇佢阿哥咁粗豪尚武，同時份人較有遠見同謀略。而喺猶太人嘅傳統之中，好多人都因而認為佢比以掃更適合做一族之長，所以上帝先至俾啟示，叫利伯加用計俾雅各做族長。
依幅十七世紀嘅油畫，描繪想像中雅各同神嘅使者搏鬥。雅各係《創世記》中嘅重要人物，以掃嘅孖生細佬。兩兄弟嘅父母係以撒同利百加，即係話雅各係亞伯拉罕同撒拉嘅其中一個孫。
根據希伯來聖經記載，利百加佗住以掃同雅各嗰陣，感覺到肚入便兩個胎兒喺度互相爭鬥。上帝喺異象中向利伯加作出啟示，話呢兩個細路將來會各自成為一個民族，而阿哥最後要服侍細佬。到生產嘅時候，以掃出世先，跟住雅各就出世，而據講雅各出世嗰陣隻手仲捉住哥哥嘅腳踭，因此父母同佢改咗個名叫雅各，呢個名據講原意係腳踭噉嘅意思。
根據猶太教傳統[註 1]，阿爸以撒偏愛以掃，而阿媽利百加則比較中意雅各[1]。
依幅十七世紀嘅油畫，描繪假扮成阿哥嘅雅各接受父親嘅祝福。《創世記》花咗相當長嘅篇幅，講雅各與以掃嘅兄弟之爭，由 25 至 33 章都一路喺度講。
雅各同以掃未出世之前，就已經喺利百加嘅腹中相爭。隨住兩兄弟長大，佢哋無論外形定個性都明顯爭好遠：以掃全身多毛，擅長打獵，亦有唔少猶太傳統記載，話佢為人粗野[註 1]；而雅各就冇咩毛，為人比較安靜內斂。兩兄弟一直喺度爭長子名份[註 2]。例如係紅豆湯嘅事噉，件事講到有一次，以掃打獵過後又攰又餓返到屋企，雅各就趁機提出，用一碗紅豆湯嚟換取以掃嘅長子名分，而以掃因為太過肚餓，輕視長子名分嘅重要性，就同意咗。此外，創世記第 27 章講到，以撒年老眼盲，準備賜予祝福俾大仔以掃嗰陣，利百加協助雅各出計，叫雅各假扮成以掃，成功呃到以撒將祝福賜俾雅各[註 3]，而依件事之後以掃對雅各產生殺機，令到雅各被迫離開家鄉，逃走去佢哋嘅母舅拉班嗰度[2]。
雅各離鄉後，服侍舅父成二十幾年咁耐，期間娶咗舅父嘅兩個女做老婆，仲育有多個仔女。後來雅各因為勤勞而事業有成。多年之後，佢喺上帝嘅指引下帶住妻兒同僕人返鄉。期間仲發生咗一段小節，講到雅各同上帝嘅使者摔角。雅各無懼挑戰，最後獲上帝賜名叫以色列[註 4]－依個名意思大致指係同上帝搏鬥嘅人噉解。
創世記第 33 章記載，以掃帶住四百人前嚟，見到多年冇見嘅細佬，最後兩人並冇動武，反而係上前擁抱。最終以掃選擇原諒雅各，經過咗咁多年之後，兩兄弟卒之和好如初[3]。
喺兄弟之爭過後，雅各仍然喺創世紀中擔當一定嘅角色。
譬如喺創世記第 34 章就講到，雅各帶住家眷搬咗去示劍城。有一日，佢個女底拿出外探望當地嘅婦女嗰陣俾城主個仔污辱，跟住雅各嘅仔，亦即係底拿嘅一眾兄長，認為爾件事係對個妹嘅嚴重羞辱，於是就設計報復，仲殺晒全城嘅男子，而雅各就感到非常擔憂，覺得家族會因此樹敵[4]。
創世記後期嘅第 37 至 50 章，主要都係講雅各個仔若瑟嘅故事，而若瑟嘅故事，就帶到《出埃及記》。依啲故事嘅重點人物係雅各啲仔，即係若瑟同埋若瑟班兄弟，雅各唔再係故事嘅重心人物，但係仍然經常被提起。
同若瑟相認返之後，雅各舉家搬咗去埃及。
創世記最後期嘅第 48 至 49 章則講到，雅各臨終前賜福畀若瑟嘅兩個仔[5]，並且作出預言，話佢（雅各）嗰十二個仔，包括若瑟在內，各有其特性，第時會成為以色列嘅十二個部族，講完之後雅各就斷咗氣，終年 147 歲。
去到最後，雅各嘅族人將佢嘅屍首帶返迦南，同佢祖父母（亞伯拉罕同撒拉）、父母（以撒同利百加）以及老婆（利亞）安葬埋一齊[6]。
佢阿爸係以撒，阿媽係利百加，阿哥係以掃。
佢結咗婚之後生咗好多個仔女，比較出名嘅有佢個女底拿同埋係及後成為希伯來人重要族長嘅若瑟。
- ↑1.01.1呢啲後來流傳嘅細節，係猶太民間傳統加添嘅，聖經本身未必有明講。
- ↑希伯來文：בְּכֹרָה / bekhorah，呢個古希伯來詞係指長子天生就有嘅地位，包括咗繼承阿爸嘅事業嘅權利，時會譯作長子名份。
- ↑利伯加此舉嘅理由，係佢醒起上帝曾經降旨，話想雅各做族長。
- ↑希伯來文：יִשְׂרָאֵל / israel
.jpg)
