越南（越南文：Việt Nam），全名越南社會主義共和國（越南文：Cộng hòa Xã hội chủ nghĩa Việt Nam），係一個東南亞中南半島東面嘅社會主義國家。越南領土同中國、老撾、柬埔寨接壤，另外係海上同泰國、馬來西亞、印尼相鄰。越南同中國喺海上專屬經濟區嘅劃分上有主權爭議。
越南由舊石器時代已經有人居住，並且逐漸發展成公元前700年紅河谷嘅東山文化，有著成熟嘅農業同青銅器技術。公元前111年西漢佔領越南，一直到公元939年吳朝建立，期間斷斷續續受到中國唔同朝代統治，是為北屬時期。獨立之後，嘅各個越南王朝不斷向南擴張。1407年明入越，開展咗20年嘅安南明屬時期。獨立後嘅後黎朝是為越南中世紀最輝煌嘅年代，並擴展領土到湄公河三角洲，征服占婆。17世紀王朝出現鄭阮紛爭，越南實際上分裂咗做廣南同安南兩國。由廣南國後人所統一嘅阮朝係越南最後一個王朝，初期嘅連綿征戰導致國力衰退，來自西方嘅法國趁機不斷加強對於越南嘅影響力，最終喺1887年實際上將越南變成法國殖民地。喺公元前111年到1887年之間，無論係中國皇朝直接統治，抑或係越南嘅獨立王朝時期，越南都大幅度受到儒家、佛教、習俗等等中華文化嘅影響。
現代嘅越南經常受到戰爭嘅波及。二戰法國本土嘅淪陷同越南日佔時期大大咁影響咗法國統治殖民地嘅能力。二戰結束之際，胡志明帶領越盟發動八月革命，於1945年宣告自大日本帝國獨立。獨立後嘅越南旋即受到法國嘗試恢復殖民嘅征戰，1954年日內瓦會議嘗試解決法越戰爭嘅問題，喺冷戰嘅局勢下，越南將根據北緯17度分成共產陣營嘅北越同反共產陣營嘅南越，1959年越戰隨即爆發。越戰除咗大幅度影響咗冷戰嘅局勢之外，亦都對越南本地造成莫大嘅破壞，包括越南船民問題等等嘅人道主義危機。就算直到1975年北越勝利越南統一，越共推行嘅計劃經濟政策亦都效率低下，更加要面對同中國同柬埔寨嘅戰爭。1986年，面對經濟上面嘅困境，越共模仿中國推動「革新開放」政策，推動國家轉型做社會主義定向市場經濟，越南經濟同民生支持終於得到發展。
而家嘅越南作為一個中低收入嘅發展中國家，有好多發展中國家常見嘅問題，例如貪污、言論審查、環境破壞及違反人權等等情況。另一方面，越南嘅經濟同民生喺革新開放之後有積極嘅發展，越南喺國際上嘅聲量亦隨住國家融入全球化嘅生產鏈而提升。越南亦都積極融入地緣政治嘅討論，越南係東南亞國家聯盟、亞太經合組織、不結盟運動、世界貿易組織等等外交組織嘅成員，並且曾經兩度出任聯合國安全理事會非常任理事國。
根據多個國家嘅歷史記載，越南嘅歷史可以追溯至4000年前。
公元前3世紀，秦朝侵略越南北部地區（包括依傢廣州一帶）。響前1世紀至10世紀嘅大部份時間，越南係喺中國古代各政權嘅統治之下。968年，丁部領統一境內嘅割據勢力而建國，響李朝建立後，宋朝承認佢嘅主權。響脫離北屬之後嘅歷史中，越南成為藩屬國。
大蒙古國時期，越南陳朝曾擊退蒙古嘅入侵。而蒙古人忽必烈嘅元朝建立之後，越南陳朝嘅陳興道又曾兩次擊退元軍嘅入侵。
嘉慶七年（1802年），阮福映建立阮朝，第二年請清朝冊封做「南越國王」，最終嘉慶帝改以「越南國王」嘅名冊封，阮朝嘅正式國號就係「越南」，取代咗以前嘅名安南，用到依家。
19世紀末，越南成為法國殖民地，直到1954年獲法國承認獨立。但未幾越南分裂成南越同埋北越，兩國打咗十幾年嘅越戰，1976年由北越統一越南。
1977年，越共四大確定咗親蘇聯嘅方針，同中共嘅關係轉趨冷淡。1978年，由於越南政府響前南越地區推行「社會主義改造」，導致大批越南華僑逃離越南。1978年12月25日，越南黎筍政府派25萬越南人民軍部隊入侵柬埔寨，越軍好快就攻入柬埔寨嘅首都金邊，並且係推翻紅色高棉後扶植名為柬埔寨人民共和國嘅親越傀儡政權，但聯合國一直唔承認柬埔寨人民共和國。1979年1月，越南同蘇聯簽訂咗《越蘇友好合作互助條約》，越軍佔領柬埔寨之後，係柬泰邊境地區部署重兵，紅色高棉亦都向泰國邊境逃跑，越軍打到柬泰邊境，令泰國邊境地區人民嘅生命財産遭到嚴重嘅損失。雙方係經過13天嘅戰鬥後講和。1979年，中國為咗分擔柬埔寨被越南攻打嘅壓力入侵越南，史稱中越邊境戰爭，中國人民解放軍係攻入越南北部嘅諒山、高平、老街三個省會之後撤軍回國。之後，中越邊境仍不斷發生衝突，衝突持續咗10年咁耐。1986年，越共換咗領導人之後，開始改變越南嘅經濟政策，佢哋學習市場經濟同埋對外開放投資嘅模式，嗰政策叫做「革新開放」。1989年，中蘇關係實現正常化，同年9月27日，越南從柬埔寨撤軍，中越邊境衝突結束。1991年，越南共產黨派出代表團訪問中國，中越關係實現正常化。1992年，韓越關係實現正常化。
1995年7月，越南同美國建交[2]。
越南全國佔地大約331,688平方公里。地形包括有丘陵嘅茂密森林，平地面積唔超過20%。山地面積佔40%，丘陵佔40%，森林佔42%。
- 佛教：越南最大嘅宗教。越南佛教係從印度傳入，但響東漢末年，大乘佛教從中國傳入越南，越南人叫佢做「北宗」。10世紀之後，被尊為國教。上座部佛教自泰國同柬埔寨傳入，稱之為「南宗」。目前信大乘佛教嘅佛教徒多啲[3]。
- 天主教：1533年傳入越南，發展迅速，響法國統治時期取得合法地位，目前有大約300幾萬嘅信徒。
- 基督新教：1893年傳入西貢，但遭法國殖民當局禁止。直到1920年，宣道會喺越南打穩基礎。基督新教而家有唔少信徒，主要分佈喺河內、海防、承天、廣南－峴港、波萊古、平順等地。
- 高台教：係1926年吳文昭、黎文忠揉和佛教、基督教、道教、儒教創立嘅本土宗教，全名係「大道三期普渡高台教」。信孔子（人道）、姜太公（神道）、耶穌（聖道）、老子（仙道）、釋迦（佛道），每日6點、12點、18點、24點要焚香誦經。
- 和好教：1939年由黃富楚創立，係佛教嘅變體，但係唔起寺廟，用塊紅布代替神像，供品係鮮花同清水。
越南由越南共產黨一黨執政，國內冇其它合法政黨，越共總書記係黨同國家最高領導人，兼任中央軍事黨委書記，掌握軍權。2001年取消政治局常委之後，黨總書記、國家主席、政府總理同國會主席被視為越共領導層嘅「四大支柱」。
響2000年，越南經已基本實現小學義務教育普及化嘅目標。2001年全面推廣9年義務教育。響2001-2002學年，越南全國大、中、小學學生大約有1,860萬名。全國有2.58萬間三級普通學校，179間高等院校。
喺開放街圖（Open Street Map）嘅
越南地圖。
|
|---|
| 東亞同北亞 | |
|---|
| 東南亞 | |
|---|
| 南亞 | |
|---|
| 中亞 | |
|---|
| 西亞 | |
|---|
| 第啲特殊政區 | |
|---|
| 主權未受廣泛承認嘅地區 | |
|---|
| 註 | - ↑傳統上認為，俄羅斯係歐洲國，但佢有好大面積領土屬於亞洲
- ↑有時俾人劃去大洋洲
- ↑部份地區有時俾人當係大洋洲
- ↑由於巴以衝突，未正式建國，但佢係聯合國觀察員國，受聯合國約四分三成員國承認
|
|---|
|
.svg)
.svg)