等軸測遊戲圖像（英文：isometric video game graphics），指遊戲入面嘅3D 畫面唔用透視投影表示，而係用等軸測投影，喺 1980 年代至 1990 年代嘅平台遊戲不時會用；咁畫嘅好處係只需要做相對簡單嘅2D 運算，就已經可以做出好睇嘅 3D 效果[1]:32。
所謂等軸測（isometric）嘅畫法其實係一種畫工程圖或者建築圖則嘅常用技巧[2]，原理係唔用消失點，唔做 foreshortening，而係 x、y、z 三軸都直接按比例放大縮細；設計圖用嘅正式畫法係用 30° 角[2]，但係用喺電腦圖像嗰陣，因為長濶一樣嘅像素砌唔出 30°，20世紀嘅遊戲，好多時都唔係真係畫 30° 角[3]，不過話雖如此，當時嘅像素，除非講緊嘅係個Unix 用家所以佢特登校到個電腦熒光幕啲像素變咗正方，其實好多個人電腦根本唔係用長濶一樣嘅像素，所以其實唔可以用而今嘅認知去分析當時究竟用咗乜嘢角度。
用爾種手法畫遊戲畫面，好似係下面幅圖噉，幅圖望落好立體，但近啲睇就會發覺幅圖查實係由一大堆 2D 嘅精靈圖砌埋一齊組成嘅；只不過啲精靈圖幅幅都整到好似由若干角度望落佢度噉嘅樣，產生「個環境望落好似真 3D 噉」嘅錯覺。
其他用咗等軸測遊戲圖像嘅遊戲例子包括 1996 年嘅《超音鼠 3D Blast》，近期例子包括《英雄聯盟》等等。
 |
