拿殊均衡點（參見英文：Nash equilibrium；呢個詞取自博弈論家莊·拿殊個姓）係博弈論講到嘅一種均衡情況。喺拿殊均衡點之下，每位博弈者都揀咗一個選擇，而且佢哋當中冇任何一個有誘因去單方面噉改變自己嘅選擇。於是場博弈就進入「穩定」嘅狀態：博弈者知道對手嘅策略係乜，但係由於自己採取緊嘅策略係最佳選擇，所以無法單方面改變自己嘅選擇。
| 阿偉揀 A | 阿偉揀 B | |
|---|---|---|
| 阿明揀 A | +1, +1 | +1, -1 |
| 阿明揀 B | -1, +1 | 0, 0 |
舉例說明，想像附圖嗰場拿殊博弈嘅報償矩陣[1]，成場博弈涉及兩個博弈者－阿明同阿偉－而佢哋各有兩個選擇 A 同 B 可以揀；根據呢一場博弈嘅規則，如果阿明揀 A 而阿偉揀 B，結果會係阿明得益 1 文阿偉損失 1 文 (+1, -1)，其餘嘅結果如圖所示；假想佢哋兩個依家都為咗將自己報償最大化而揀咗 A，對阿明嚟講，佢改變選擇而同時阿偉嘅選擇不變，噉佢自己會變成損失 1 文，阿偉都係同一道理；於是喺呢個情況下，佢哋兩個進入咗雙方都揀咗 A 嘅狀態後，就再冇誘因單方面改變自己嘅選擇－呢個狀態就係是次博弈嘅拿殊均衡點[2]。
唔係所有博弈都有一個拿殊均衡點－有啲博弈有多過一個拿殊均衡點，例如獵鹿博弈噉，又有啲博弈係冇拿殊均衡點嘅[3]。
例如監犯困境呢種經典博弈噉。最基本嘅監犯困境可以噉講：依家有兩個監犯—阿明同阿松—俾警察拉咗。警察想佢哋認罪，於是將兩人分開審問，唔俾佢哋通訊，然後各自提出相同條件：
呢個情況可以畫成報償矩陣（每格嘅數字分別代表阿明同阿松要坐幾多年）[4][5]：
| 阿松揀認罪 | 阿松唔出聲 | |
|---|---|---|
| 阿明揀認罪 | 5, 5 | 0, 10 |
| 阿明唔出聲 | 10, 0 | 0.5, 0.5 |
由整體嚟睇，兩人一齊唔認罪係最好結果（各坐半年）；但由於兩個人互相唔知對方會點揀，如果假設佢哋都係理性嘅話，佢哋會各計自己利益：無論對方認唔認罪，自己認罪都一定坐得少啲。結果兩個都會選擇認罪——呢個組合就係是次博弈嘅拿殊均衡點，冇人可以單方面改變策略而得到更好結果。
例如兩性大戰呢種經典博弈噉。兩性大戰帶有協調性質，但又包含衝突成份。假想有一對情侶想一齊出街，有兩個選項，去睇拳賽或者睇芭蕾舞。男方鍾意拳賽，女方鍾意芭蕾舞，但兩個人都寧願一齊行動，好過各自分開。佢哋嘅報償矩陣可以表達成如下形式，當中第一個數為男方嘅收益，第二個數為女方嘅收益。[6]
| 女方揀拳擊 | 女方揀芭蕾 | |
|---|---|---|
| 男方揀拳擊 | 3, 2 | 0, 0 |
| 男方揀芭蕾 | 0, 0 | 2, 3 |
喺純粹策略下，是次博弈有兩個拿殊均衡點：
兩個均衡點都代表雙方冇誘因單方面改變策略，但同時反映協調同公平之間嘅矛盾。
亦可以睇吓獵鹿博弈。
