姜維（粵拼：goeng1 wai4；202年—264年），字伯約baak3 joek3，天水郡冀縣（而家甘肅甘谷縣）人。原本係曹魏天水郡嘅中郎將，後尾投降蜀漢。佢喺諸葛亮死後發動十一次北伐，但都失敗咗。最後姜維因而匿去沓中度屯田。之後曹魏派鍾會同埋鄧艾攻打蜀漢，後主劉禪投降鄧艾，蜀漢滅亡。姜維喺蜀亡之後投降鍾會，諗住借鍾會嘅野心嚟復國。最後叛變失敗，佢同鍾會喺亂軍中陣亡。
姜維開頭係魏國將領，建興六年諸葛亮出兵祁山，姜維同梁緒、尹賞仲有梁虔幾個正同天水太守馬遵同行，馬遵聽到蜀軍嚟到而且周圍嘅縣都響應蜀軍，懷疑姜維幾個都有異心，所以唔理姜維幾個自己走咗去，姜維幾個睇到馬遵走咗，想返去，但城門閂埋咗，想返去冀城都被趕出門外，喺呢個情況下唯有向蜀漢投降。
