地級（粵音：dei⁶ kap¹）係中華人民共和國嘅地級政區嘅一級，所謂地級，即係地區級，喺政區架構中屬第二級，介乎於省級同縣級之間。地級市係最主要嘅地級政區。地級市嘅意思就係一個地方嘅中心城市，佢重有個名叫省轄市（英文：provincial city），不過呢個名睇唔出作為「區域城市」嘅含義，所以以「地級市」爲正。通常地級市嘅市區係佢政區轄內嘅核心，周圍係佢轄下嘅縣級政區啲郊區、農村，呢啲郊區、鄉下嘅面積大過市區，有時連人口都多過市中心。原因在於，一個地區係包括咗一啲城市、市鎮、縣，呢啲都係歸作「地區級」嘅地級市管，一夾埋面積、人口，就會多過市中心好多。地級市管嘅縣級政區類型有市轄區、縣同埋縣級市。

1983年11月5號中國改革政區、設立地級市，到2013年2月8號，全中國有286個地級市^[1]。一啲地級市嘅規模好大，其中保定（河北）、周口同南陽（河南）、臨沂（山東）嘅人口超過直轄市天津。

家下中國有15個地級市因為發展得好有影響而升格爲副省級城市（英文：sub-provincial city），有比普通地級市更大嘅治理權限。即係特別市。

地級政區中除咗有地級市，重有呢啲類型：

• 地區（英文：prefecture）。而家嘅地區都變曬做省轄市。得返17個地區，大部分喺西藏（6個）同新疆（7個），另外就喺貴州（2個）、青海同黑龍江各1個。
• 自治州（英文：autonomous prefecture）。而家有30個自治州。
• 盟（英文：league）。得內蒙古先有，原先嘅盟大部分變曬做地級市，而今剩返3個。

• 縣級

• 中華人民共和國政區分級