UK go recognise Palestinian state unless Israel agree to 'certain' conditions

UK don tok say dem go recognise a Palestinian state for September unless Israel take "substantive steps to end di horrible situation for Gaza", Sir Keir Starmer tok.

Di prime minister say Israel must also meet oda conditions, wey include make dem agree to ceasefire and allow di United Nations restart di supply of aid, if not UK go take di step for September UN General Assembly.

Di govment bin don tok before say di recognition suppose come as part of one peace process and for point wia dem fit get maximum impact.

However, di PM don dey under growing pressure - including from im own lawmakers - to act more quickly.

For one news conference afta e hold emergency cabinet meeting, Sir Keir tok say im dey announce di plan now sake of di "intolerable situation" for Gaza plus concern say "di very possibility of a two-state solution dey reduce".

E tell tori pipo say, UK goal of "a safe secure Israel alongside a viable and sovereign Palestinian state" dey "under pressure like neva bifor".

Di PM add say, im "primary aim" na to improve di situation wey dey ground for Gaza, wey include ensuring aid enta di region.

Conditions UK give to recognise Palestinian state

Last week, France bin also announce say dem go officially recognise a Palestinian state for September - di first of di G7 group of di world richest countries to do so.

Sir Keir say UK go recognise a Palestinian state unless di Israeli govment take steps wey include:

• Agreeing to a ceasefire

• Commit to a long-term sustainable peace, revive di prospect of a two-state solution

• Allow di UN to restart di supply of aid

• Make am clear say annexations no go dey for di West Bank

Meanwhile, e say Hamas must immediately release all hostages, sign up to ceasefire, disarm and accept say dem no go play any part for di govment of Gaza.

Israel react to UK stand on Palestinian Statehood

Di Israeli Ministry of Foreign Affairs don react to di UK Prime Minister statement.

One short statement from di ministry say, "Israel reject di statement by di prime minister of di United Kingdom.

"Di shift in di British govment position at dis time, afta di French move and internal political pressures, na reward for Hamas and e harm efforts to achieve ceasefire for Gaza plus framework for di release of hostages."

Wetin recognising a Palestinian state mean, and oda countries wey don do am?

Most countries - about 139 in all – don formally recognise a Palestinian state.

However, many European nations plus di United States say dem go only do so as part of moves towards a long-term resolution to di conflict wit Israel.

German Chancellor Friedrich Merz say im govment no get plans to recognise a Palestinian state in di near future, as e suggest say dis fit be "one of di last steps on a path to realising a two-state solution".

Spain, Ireland and Norway bin formally take di step last year, as dem hope to employ diplomatic pressure wey go lead to ceasefire for Gaza.

France neva recognise Palestinian state yet – but dem go do so, President Emmanuel Macron tok, for di United Nations General Assembly for September. Dis na wetin Prime Minister Keir Starmer now don tok say UK sef go do, unless Israel meet certain conditions.

Chairperson of di African Union Commission Mahmoud Ali Youssouf bin welcome di announcement of President Emmanuel Macron of France wey express im intention to recognise di State of Palestine.

Di Chairperson for one statement ova di weekend say dis development na correct step toward a just, lasting, and comprehensive solution to di Israeli-Palestinian conflict,

For di United Nations (UN), representatives of Palestine currently get limited rights to participate for UN activity, and di territory also dey recognised by various international organisations, including di Arab League.

Critics argue say recognition go just be symbolic gesture if dem no first address di issue of leadership plus di extent of a Palestinian state.

Former UK Foreign Office boss Lord McDonald wey follow BBC tok last week bin argue say recognition itself "no really be big deal" – as e go only "vex di Israelis, e go make di Americans vex, and pipo go ask say wetin be di beef, wetin be di follow-up, and di follow up dey very difficult to deliver".