Movatterモバイル変換

] [] [] [] [] [] [] [] []

| | | | | | | | | | | | | | |

2007-07-31

'ԱԶԳԻ' ԿԱՅՔԷՋԻ ՀՅՈՒՐՆ Է ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆ ԱՐՄԵՆ ՀԱՐՈՒԹՅՈՒՆՅԱՆԸ

Նարեկ, Երեւան, 2007-26-07 15:53:04 , IP Code: 2f 804

- Կարծում եք այն երեւույթը, որ ՀՀ քաղաքացիների դեմ օգտագործվում են հատուկ ջոկատայիններ այգիները պաշտպանելու կամ այլ մանր-մունր դեպքերում, նորմա՞լ է: Ես նկատի ունեմ Պուշկինի փողոցի դեպքերը: Ի՞նչ է, ոստիկանությունն այդքան անզո՞ր է: Ի՞նչ եք Դուք անձամբ արել, որ նման բան այլեւս չկրկնվի: Խնդրում եմ շատ կոնկրետ նշեք Ձեր քայլերը:

- Իրոք, դեպքեր կան, որ ոստիկանությունը դիմում է հատուկ ջոկատայինների օգնությանը: Դա արտառոց երեւույթ չէ: Մենք մեր ուժերով թույլ չենք տալիս, որ այդտեղ ինչ-որ շինարարություն իրականացվի` փաստաթղթեերի թերի լինելու պատճառով, բայց այնուամենայնիվ հարցը պետք է լուծում ստանար: Հիմա կարծեմ կասեցվել է խնդիրը, եւ գործն ուսումնասիրվում է: Բայց պետք է նաեւ նշեմ, որ անհրաժեշտ է նաեւ խուսափել նման բաներից, որովհետեւ եթե մարդիկ գնում են տարածք եւ չեն կարողանում շինարարություն իրականացնել, սա էլ է խնդիր: Ուրեմն կա մեկը, որ չպետք է այդ տարածքները վաճառի կամ եթե վաճառում է, ուրեմն պետք է պատշաճ մակարդակով ծառայությունն իրականացնի: Այս դեպքում հասարակությունը տեղեկացված չէր շինարարության մասին: Հիմա նամակներ ենք գրել համապատասխան գերատեսչություններին եւ պատասխանը ստանալու դեպքում հարցին լուծում կտանք:

Մանվել, Հայաստան, Երեւան, 2007-26-07 14:10:52 , IP Code: 01c6c

- Հարգելի պրն.Հարությունյան, ես շատ հարցեր կուզեի ուղղել Ձեզ, սակայն հաշվի առնելով, որ Դուք էլ «ամենազոր» չեք, ընդամենը մի քանի «ցավոտ» հարցեր կուղղեմ: Կանխավ շնորհակալություն պատասխանների համար:

1. Ըստ Ձեզ Հայաստանում «միջին» քաղաքացին ինչքանո՞վ է կարողանում պաշտպանել իր տարրական իրավունքները եւ եթե նույնիսկ մարդ տեղեկացված ու գրագետ է լինում, ըստ Ձեզ, մեր երկրում կա՞ն արդյոք պայմաններ սեփական իրավունքներն ու արժանապատվությունը պաշտպանելու համար:

- Պայմաններ կան, բայց դրա արդյունավետությունը դեռ ցածր է, քանի որ Հայաստանն անցումային երկիր է, ժողովրդավարության ճանապարհին եւ դրա համար էլ այդ պայմանների վիճակն անբավարար է: Սակայն այդ ուղղությամբ շարժ կա, եւ ժամանակի ընթացքում արդյունքը կլինի:

- 2. Եթե կետ առ կետ դիտարկենք մեր սահմանադրության առաջին երեք հոդվածները (կարծում եմ չարժե թվարկել), արդյոք Դուք կարո՞ղ եք մատնանշել գեթ մեկ պարբերություն, որը լիարժեքորեն գործում եւ պաշտպանվում է մեր երկրում (այս հարցը կարծում եմ բացի Սահմանադրական դատարանից Ձեզ էլ պետք է հետաքրքրի):

- Լիարժեքորեն ոչ, բայց այդ ուղղությամբ դրական գործընթաց կա:

- 3. Ինձ ասել են, որ Դուք տեղյակ եք, որ մեծանուն ազգային գործիչ Ալեքսանդր Վարպետյանին արդեն 5 տարուց ավելի պարզապես արգելում են մուտք գործել իր սեփական հայրենիք եւ իր սեփական տուն: Ինչո՞ւ այդ հարցով պարզաբանումներ չեք տալիս: Հուսով եմ տեղյակ եք, որ Ձեր նախորդը` հարգարժան տիկ. Լարիսա Ալավերդյանը, այս հարցը մանրամասն ուսումնասիրել է եւ տվել է համապատասխան եզրակացություններ, որտեղ հստակ ասվում է, որ տեղի է ունեցել օրենքի ակնհայտ ոտնահարում:

- Մենք դիմել ենք արտգործնախարարություն, հարցն ուսումնասիրել են եւ ասել, որ իրենք, հաշվի առնելով մյուս գերատեսչությունների կարծիքը, Ալեքսանդր Վարպետյանի մուտքը Հայաստան նպատակահարմար չեն համարում: Նա կարող է մուտք գործել երկիր, բայց հատուկ կացությունը նրա համար նպատակահարմար չեն համարել.

- 4. Ըստ Ձեզ, երբ մի երկրի ազգային հեռուստատեսությունը (եւ ոչ միայն) գործում է բացառիկ վերահսկման եւ «ցենզուրայի» պայմաններում, ապա կարո՞ղ ենք համարել, որ այդ երկրում մարդու իրավունքները պաշտպանված են:

- Այն, որ մենք բազմակարծության հետ խնդիր ունենք, համաձայն եմ, բայց բացարձակ ցենզուրայի մասին խոսելը չափազանցված է: Ընդ որում, տպագիր մամուլում բազմակարծությունն ավելի շատ է, քան հեռուստաընկերություններում:

- 5. Ձեր կանխատեսմամբ քանի՞ «հարյուրամյակ» հետո մեր երկրում կստեղծվի մի իրավիճակ, ուր ասենք ոմն նախարար X-ի եւ ասենք մեր գյուղի նախրապան Y-ի իրավունքները պաշտպանված կլինեն հավասարաչափ, եւ նրանք օրենքի առաջ հավասար պատասխանատվություն կկրեն:

- Որքան շուտ, այնքան լավ, իսկ շուտն ու ուշը մեզնից է կախված: Յուրաքանչյուրս պետք է մեր իրավունքների համար պայքարող քաղաքացի լինենք:

Հ. Թորոսյան, 2007-26-07 10:30:55 , IP Code: d6631

- Քաղաքացուն առանց ջրի պահելը, նկատի ունեմ նրա ջուրը կտրելը, մարդու իրավունքների խախտո՞ւմ է, թե ոչ: Ես ցանկանում եմ դատի տալ Ջրմուղկոյուղուն եւ պահանջել հատուցում ինձ պատճառած նյութական եւ բարոյական վնասի համար: Կաջակացի՞ ինձ արդյոք մարդու իրավունքների պաշտպանն այս հարցում: Եթե այո, ապա ի՞նչ աջակցություն կարող եմ սպասել:

- Այո, միանաշանակ կարող եք սպասել աջակցության: Եկեք այստեղ եւ միասին կուսումնասիրենք Ձեր խնդիրը:

Եվրոպական ակադեմիայի ուսանող, Երեւան, 2007-26-07 10:16:03 , IP Code: ad415

- Հարգելի պարոն Հարությունյան, մենք` Եվրոպական ակադեմիայի անցյալ տարվա ընդունված ուսանողներս, բազմաթիվ անգամներ դիմել ենք նաեւ Ձեզ` կապված կառավարության որոշման հետ, որն ընդունվել էր քաղաքական պատճառներով` ի թշնամություն Արթուր Բաղդասարյանի: Դրա պատճառով մեր ուսումնական հաստատության տարկետման քվոտան պակասեցվեց ծիծաղելի աստիճան: Ինչո՞ւ ոչ մի քայլ չեք կատարել այս ուղղությամբ: Մի րոպե պատկերացրեք, որ սա կատարվեր Ձեր տղայի` Ալեքսի հանդեպ: Այդ դեպքո՞ւմ էլ Դուք կպահեիք Ձեզ այդքան անտարբեր եւ հանգիստ:

- Մենք այդ գործով զբաղվել ենք եւ համապատասխան գերատեսչությունների դիմել ենք: Այդտեղ փաստաթղթերի վիճակը լիարժեք չէր: Սա այն դեպքն էր, որ հարցը կարող էր լուծվել միայն դատարանի միջոցով, ինչպես էլ եղավ: Այստեղ մենք այլեւս անելիք չունեինք` չնայած որ համապատասխան գերատեսչությունների դիմել էինք խնդրանքով: Բայց սա դատարանի գործն էր:

Բժշկուհի Ա.Կ., Երեւան, 2007-25-07 09:11:27 , IP Code: 4cc60

- Հարգելի պարոն Արմեն Հարությունյան, չեմ նախանձում Ձեր վիճակին` այս պայմաններում այդպիսի պաշտոն ստանձնելու եւ համարձակվելու հրապարակավ «Ազգ»-ի հյուրը դառնալու համար: Նախապես շնորհակալություն Ձեզ անմիջական հարցեր ուղղելու հնարավորություն ընձեռնելու համար:

Ես բժշկուհի եմ աշխատում եմ Երեւանի Բժշկական կենտրոններից մեկում` որպես պոլիկլինիկայի թերապեւտ: Ամեն ամիս մեր տնօրենը ստիպում եմ մեզ`

Մեր աշխատավարձից իրեն «նալոգ» տալ,

Մեզ շատ մտերիմ հիվանդների անկետաներում կեղծ հիվանդություն ձեւակերպել եւ թանկ դեղեր դուրս գրել ու հանձնել իրեն,

Կեղծ տվյալներ ներկայացնել առողջապահության գործակալություն` իբր թե այսքան հիվանդ է ընդունվել, այսքան հետազոտություններ են կատարվել եւ այլն,

Ձեւակերպել է մեզ 0,5 դրույք եւ ամեն անգամ «Դամոկլյան սրի» նման վախեցնելով, որ պահանջները չկատարելու դեպքում ընդհանրապես կազատի աշխատանքից, այսպես ստրկական վիճակում է պահում մեզ: Աշխատավարձն էլ ամսական 15000 դրամ (պետք է ուրախանանք, քանի որ քույրս աշխատում է ստացիոնարում եւ ստանում է ընդամենը 8500 դրամ):

Մի բան էլ է ուզում մեզանից, որ ամաչում ենք գրել:

Ինչպե՞ս բողոքենք: Նկարահանե՞նք այս ամենը, որ ապացույցներ ունենանք: Չէ՞ որ տնօրենը իր վերեւինի հովանավորությամբ է այս ամենն անում: Լավագույն դեպքում, իրեն նկատողություն կհայտարարեն, մեզ էլ կզրկեն աշխատանքից: Ընդ որում, մեր այս դեպքը, մասնավոր մի դեպք չէ, այլ բնորոշ է Երեւանի շատ այլ պոլիկլինիկաներին, իսկ ստացիոնարներում ընդհանրապես «գերագույն ստրկություն է»: Խնդրում ենք, շատ ենք խնդրում, աղերսում ենք, ասեք, ինչպես վարվել: Մի՞թե մեր կյանքն այսպես պետք է անցնի: Ելք ցույց տվեք խնդրեմ, գոնե հիշեք, որ Ձեր երեխա եղած ժամանակ ինչպես է Ձեր տեղամասային մանկաբուժը Ձեզ օգնել` գոնե հանուն այդ հիշողության:

- Մենք նաեւ բանավոր բողոքի ինստիտուտ ունենք, որտեղ կարելի է գալ, բանավոր հայտնել բողոքը եւ չնշել ոչ անունը եւ ոչ էլ ազգանունը: Սա գաղտնի է լինում: Մենք պարզապես ստանում ենք ինֆորմացիան եւ զբաղվում այդ հարցով: Եկեք այստեղ, բանավոր բողոքեք, Ձեր անունը ոչ ոք չի իմանա, եւ մենք կզբաղվենք այդ հարցով:

Ալեքսանդր Գեւորգյան, Հայաստան, Երեւան 2007-24-07 18:09:30 , IP Code: 195a3

- Մեծարգո իմ իրավունքների պաշտպան! Մարդու հավատ էլ չի գալիս, թե Հայաստանում այդպիսի «թիկունք» ունենալը հնարավոր բան է: Եթե իրոք հնարավոր է, ապա ես կցանկանայի, որ ձեր ունեցած միջոցներով Դուք կարողանայիք վերջ տալ այն ամենօրյա հրապարակավ գողությանը, որը մեր երկրում կատարվում է գովազդային հոլովակներով Ռուսաստանի բոլոր հեռուստաահաղորդումներից: Մի՞թե բարոյական է հեռուստացույցով գողություն գովազդելը: Եթե դա է մեր կյանքի նորման, ապա ի՞նչ իմաստ ունի «կույր ու խուլ» մշակույթի նախարարություն պահելը: Նույնը վերաբերվում է առողջապահության ու տրանսպորտի նախարարությանն ու ոստիկանությանը, որոնց աչքի առաջ Երեւանի միկրոավտոբուսները վեր են ածվել ծխարանների: Ձեր գոյությունն էլ անիմաստ պիտի համարել, եթե չկարողանաք փողի կամ այլ միջոցի պահանջ չունեցող խնդիրը լուծել: Մեծագույն հույսով եւ հաւգանքներով Ալեքսանդր Գեւորգյան:

- Ինչը մեր ուժերի մեջ է, կփորձենք անել: Շնորհակալություն ինֆորմացիայի համար: Ասեմ նաեւ, որ մենք մասնավոր սեկտորով չենք զբաղվում, այլ` բացառապես պետական եւ տեղական ինքնավարման մարմինների գործունեությամբ:

Ա. Դարբինյան, Երեւան, 2007-24-07 14:06:18 , IP Code: 904e1

- Հարգարժան պարոն Հարությունյան,

Քանի՞ տարի է պետք, որ կարողանաք հպարտորեն ասել` «Մարդու իրավունքները պաշտպանված են Հայաստանում»։ Շնորհակալություն

- Ինչքան շուտ, այնքան լավ` բոլորիցս է կախված:

Ներսես, Բելգիա, 2007-24-07 12:29:31 , IP Code: eeb3c

- Բարեւ Ձեզ հարգելի Արմեն Հարությունյան, ունեմ երկու հարց եւ խնդրում եմ պատասխանեք ԱՆԿԵՂԾ:

1. Նշեք Հայաստանում մեկ ոլորտ կամ համակարգ, որտեղ մարդու իրավունքները չեն խախտվում:

- Այդպիսի ոլորտ գոյություն չունի:

- 2. Մտադի՞ր եք արդյոք առաջիկայում Հայաստանում բարձրաձայնել մարդու իրավունքների եւ հիմնարար ազատությունների պաշտպանության մակարդակն էապես եւ արմատապես բարելավելու անհաժեշտության մասին ու այդ ուղղությամբ կատարել կոնկրետ գործնական քայլեր: Շնորհակալություն:

- Մենք պարբերաբար դա անում ենք` թե տարեկան զեկույցով, թե պարբերաբար հրավիրվող մամուլի ասուլիսների միջոցով:

Անահիտ Սարգսյան, Երեւան, 2007-24-07 12:15:23 , IP Code: b5cba

- Մեծարգո պարոն, հարցս ի պաշտոնե Ձեզ չի վերաբերվում, սակայն հնարավոր է, որ կհուզի... Աղջիկս բավական տաղանդավոր է, երազում է ռոք երգչուհի դառնալ: Ի՞նչ անել, եթե այդ ճանապարհը բավականին թանկ արժե, գուցե հովանավո՞ր է պետք, ինչպե՞ս եւ որտեղի՞ց գտնեմ:

- Կներեք, բայց այդ հարցով չենք կարող օգնել:

Արթուր, Հայաստան, 2007-23-07 22:10:56 , IP Code: 62a3e

- Բարեւ Ձեզ հարգելի Արմեն Հարությունյան,

1. Ո՞րն է մարդու իրավունքների պաշտպանի հիմնական գործառույթը եւ մտահոգությունը:

- Մարդու իրավունքների պաշտպանի հիմնական գործառույթը քաղաքացիների եւ պետական ապարատի միջեւ եղած խնդիրների լուծումն է:

- 2. Ո՞ր դեպքում ՀՀ քաղաքացին կարող է դիմել Ձեզ եւ ի՞նչ հարցի շրջանակներում:

- Յուրաքանչյուր իրավունքի խախտման դեպքում, եթե դա տեղի է ունեցել պետական մարմնի, տեղական ինքնակառավարման մարմնի կամ պաշտոնյայի կողմից:

- 3. Ինչպե՞ս եք օբյեկտիվորեն գնահատում ՀՀ-ում ներկա արդարադատության, դատական, դատաքննչական, դատավարական համակարգերը:

- Մեզ եկած բողոքների հիմնական մասն ուղղված է այդ համակարգերի դեմ, եւ վերը թվարկված համակարգերում տիրող իրավիճակը հեռու է բավարար լինելուց:

- 4. Ու՞մ եք սատարելու ՀՀ նախագահի առաջիկա ընտրություններում:

- Օրը կգա, բարին հետը:

- 5. Ի՞նչ եք մտածում, ԼՂՀ-ում նախագահական ընտրությունները արդար, թափանցիկ էին, համապատասխանո՞ւմ էին ընդունված միջազգային նորմերին: Շնորհակալություն:

- Բոլոր քաղաքական ուժերը եւ միջազգային դիտորդները միահամուռ կերպով հայտարարեցին, որ Ղարաբաղի ընտրությունները եղել են արդար եւ թափանցիկ:

Արմինե Հովսեփյան, Ռուսաստան, Ռոստով, 2007-23-07 17:23:59 , IP Code: 7971f

- Հարգելի Արմեն Հարությունյան, մեծագույն հարգանքներս: Ինձ դուր է գալիս Ձեր աշխատանքը եւ ընտրած ուղին: Մեկ հարց ունեմ`

Ե՞րբ վերջնականապես Հայաստանում կկայանա մարդու իրավունքների պաշտպանի ինստիտուտն իր ողջ էությամբ: Նախապես շնորհակալություն:

- Ինստիտուտի կայացումը կախված է նաեւ պետական համակարգի կայացումից, որովհետեւ ինստիտուտի արդյունավետությունը ուղղակիորեն կապված է պետական համակարգի արդյունավետ գործունեությունից:

Սիրուն Հադարչյան, Գեղարքունիքի մարզ, Սարուխան, 2007-23-07 16:21:30 IP Code: unknown

- Հուլիսի 10-ին իմ որդուն Բալահովիտի N-րդ զորամասի սպաները ծեծի են ենթարկել այնպես, որ նրան տեղափոխել են հոսպիտալի հոգեբուժարան: Մենք քեֆ ու ուրախությունով մեր երեխային բանակ ուղարկեցինք, որ նրան այդ օրը գցե՞ն: Ես մայր եմ եւ պահանջում եմ, որ իմ որդուն տուն վերադարձնեն առողջ: Մեզ նման բանակ պետք չի, եւ ես իմ մյուս երկու զավակներին չեմ թողնի, որ բանակում ծառայեն: Դեռ ավելին ասեմ, մեր գյուղի մարդիկ այս դեպքից հետո իրենց տղաներին կամաց-կամաց դուրս են ուղարկում:

Խնդրում եմ այս գործի նկատմամբ եղեք ուշադիր, որ մեղավորները պատժվեն: Տղայիս առողջությունը քայքայվեց, եւ ես չեմ ուզում, որ նա վերադառնա զորամաս եւ այդ հոգեկան վիճակում դեռ մեկ տարի ծառայի: Ո՞ւմ համար: Դրանց, որ մեր երեխաներին հաշմանդամ են վերադարձնում: Բա սա երկի՞ր է, սա պետությո՞ւն է, թե անտերություն է: Հետ տվեք իմ զավակին այնպես, ինչպես ես եմ ուղարկել բանակ: Եթե պետք լինի, ես հացադուլ կհայտարարեմ, ու թող աշխարհն իմանա, թե մեր բանակում ինչ կարգեր են գործում: Իմ տղան` Շավարշ Վահեի Մակարյանը, 19 տարեկանում հաշմանդամ դարձավ, բայց պարզ է, որ նրան հաշմանդամության կարգ չեն տա, որ իրենց կեղտերը ջրի երես դուրս չգան:

Խնդրում եմ օգնեք ու հսկողություն սահմանեք, որ նման սպաները պատժվեն ու վռնդվեն բանակից, այլ ոչ թե մեր զավակներին հաշմանդամ դարձնեն:

Հարգանքներով զինվորի մայր` Սիրուն Հադրաչյան: Հեռ. (0264- կոդ) 3-24-76. 091-51-64-96.

- Սրանով մենք չենք զբաղվում, որովհետեւ անմիջապես հրամանատարությունն է արձագանքել այս գործին: Հարուցվել է քրեական գործ, ընթանում է նախաքննությունը: Բայց եթե դատավարական խնդիրներ ունենաք, կօգնենք:

Սոնա Արշունեցի,_Բրյուսել, arshuneci@yahoo.fr, 2007-23-07 12:06:59 , IP Code: 62796

- Հարգելի Արմեն Հարությունյան, ուրախալի է, որ Դուք եք «Ազգ»-ի ֆորումի հյուրը, եւ ես կկարողանամ օգտվել ընձեռված հնարավորությունից ու արտահայտել իմ մտահոգությունը: Եթե մենք իրոք ուզում ենք դառնալ իրավական երկիր ու փորձում ենք հայ քաղաքացուն հաղորդ դարձնել իր իսկ իրավունքներին, ինչպե՞ս կարելի է Հանրային հեռուստատեսությամբ հեռարձակել «Իմ իրավունքը» հաղորդաշարը: Ինչպե՞ս կարելի է հեռուստատեսությամբ հեռարձակել նման խայտառակ դատավարություններ, որոնք ոչ այլ ինչ են, եթե ոչ օրը ցերեկով մարդուն դատ ու դատարանով կողոպտելու ձեւ: Զավեշտական է, բայց դառն իրողություն` հեռարձակվում է նման հաղորդում, որ հանրությանը կերակրեն մեր անկատար օրենքներով: Օրենքներ, որոնք երկու դեմք ունեն, քամելեոնի նման փոխում են իրենց գույնն ու որակը` հարմարվելով միջավայրին, ու մուրճի մի հարվածով մարդկանց զրկում են իրենց օրինական ժառանգությունից: Չի կարելի գովեստի խոսք չասել Ռուսաստանով հեռարձակվող դատավարությունների մասին, որտեղ եւ դատավորներն, եւ փաստաբաններն իսկապես արհեստավարժ են ու վճիռ է կայացվում դատավարության ընթացքում մանրազնին քննությունների ու փաստարկների արդյունքում: Հարցեր են, որոնք կարոտ են ճշմարտության... Ես մեծ հետաքրքրությամբ դիտում եմ բոլոր հեռարձակվող դատավարությունները եւ, եթե ուշադրություն դարձնենք, հաճախ է խախտվում օրենքը, եթե այդպիսի դատավարությունները կարելի է համարել մեր իրավունքների իմացության ամբիոն:

- Վերահասցեավորեք Ձեր ասելիքը արդարադատության նախարարություն կամ արդարադատության խորհուրդ, քանի որ դատավորների հարցերով նրանք են զբաղվում, եւ Ձեր մտահոգության լուծումը դուրս է մեր իրավասությունների սահմաններից:

Սոնա Արշունեցի,_Բրյուսել, arshuneci@yahoo.fr, 2007-23-07 12:06:59 , IP Code: 62796

- «Ազգ»-ի «Նամակ Դերբենդից» նամակը կարդալով` մարդ մտովին տեղափոխվում է Ստալինյան ժամանակները, երբ մեր հայ մատնիչների մեղքով քանի՜, քանի՜ հայ մտավորականներ գնդակահարվեցին ու բանտարկվեցին: Իսկ ի՞նչ է կատարվում այսօր Հայաստանում: Ազգը պառակտող այս ի՞նչ քաղաքականություն են որդեգրել հայաստանյան իրավապաշտպան մարմինները. (եթե իհարկե կարելի է այդպես կոչել): Ձերբակալում են ժիրայր Սեֆիլյանին, Վարդան Մալխասյանին, Վահան Ահրոնյանին: Ի՞նչ իրավունքով են մարդկանց ամիսներ շարունակ փակում ՊԱԿ-ի նկուղներում:Պետական հեղաշրջման փո՞րձ.: Հետո էլ Եվրոպայի աչքերին թոզ են փչում, թե Հայաստանում խոսքի ազատություն կա: Ծիծաղելի է, ո՞վ իրավունք ունի սասանել մեր իշխանավորների հանգիստը, երբ նրանց աթոռներին վտանգ է սպառնում, թեկուզ հեռակա կարգով: Սթափվեք, քանի հայի միջից իսպառ արմատախիլ չեք արել հայրենասիրական ոգին: Կանխավ շնորհակալություն:

- Ժիրայր Սեֆիլյանին, Վարդան Մալխասյանին եւ Վահան Արոյանին մենք բազմիցս անդրադարձել ենք, եւ նրանք դատավարական օրենքների խախտումներ չունեն:

Արաքսյա Մարգարյան, Հյուսիսային Հոլիվուդ, 2007-23-07 09:32:09 , IP Code: 074fb

- Ես` որպես Հայաստանի հանրապետության քաղաքացի, ուզում եմ Ձեզ հարց տալ: Ե՞րբ կարող ենք գալ մեր հայրենիք եւ ազատ, պաշտպանված, աշխատանքով զբաղված ապրենք մեր երկրում` առանց վախի զգացմունքի: Մենք վախենում ենք, որ մեր երեխաները նույնպես կհայտնվեն Արման Բաբաջանյանի վիճակում, եւ Ձեր նման մարդու իրավունքների պաշտպանը ոչ մի բանով չի օգնելու նրան: Ես վստահ եմ, որ Ձեզ Ձեր նախագահը թույլ է տվել մի քիչ չոր խոսել իշխանությունների մասին, որպեսզի ժողովուրդը Ձեզ հավատա: Բայց ժողովուրդը շատ լավ հասկանում է ամեն բան: Դե, որպես մարդու իրավունքների պաշտպան, կարող եք օգնել Արման Բաբաջանյանին: Նա արդեն իրենը նստել է, եւ նա էլ Ձեր նման լավ կրթված երիտասարդ է: Նա սիրում է իր հայրենիքը, բայց Դուք թույլ չեք տալիս նրան ազատ ապրել իր երկրում: Խնդրում եմ պատասխանեք` ինչպես պատահեց, որ այդ անկախ հանձնաժողովը 56 հոգուց միայն չորսին ազատեց, այն էլ` կրկնահանցագործ, իսկ Արմանի նման երիտասարդը պետք է մնա վանդակաճաղերի հետեւում:

- Շնորհակալություն վիրավորանքի համար: Արման Բաբաջանյանին մենք տեսել ենք եւ նրա գործով զբաղվել ենք: Մեր տարեկան զեկույցում ընդգծել ենք, որ նրա նկատմամբ պատիժը բավական խիստ է եղել: Իսկ հանձնաժողովում կողմ է քվեարկել նրա վաղաժամկետ ազատմանը: Մյուս հարցը մեր իրավասությունների մեջ չէ, կոնկրետ խնդիրների դեպքում, մենք կարձագանքենք: Եվ կյանքն էլ բավական բազմաշերտ է, պետք չէ այդքան պարզունակ դարձնել:

Բագրատ, Հայաստան, 2007-22-07 12:51:54 , IP Code: 4f574

- Պարոն Հարությունյան, արդյո՞ք մարդու իրավունքների պաշտպանության աշխատակիցները ընդգրկվելու են որպես քաղաքացիական ծառայող: Ինչպիսի՞ն է Ձեր կարծիքն այդ հարցի կապակցությամբ:.

- Որպես քաղծառայող` բացառվում է, որովհետեւ դա կհակասի օմբուդսմենի միջազգային կարգավիճակին , բայց որպես հանրային ծառայող` պիտի օրենք մշակենք:

Ս.Ավագյան, Երեւան, 2007-22-07 11:03:42 , IP Code: a5f96

- Հարգելի պարոն Արմեն Հարությունյան, բոլոր զարգացած կամ իրենց որոշ չափով օրենքի երկիր կարծող պետություններում պետական բուժհիմնարկներում կամ պետական դպրոցներում (կրկնում եմ պետական, ոչ թե մասնավոր) բժիշկ կամ ուսուցիչ աշխատանքի ընդունելու համար մրցույթ է հայտարարվում եւ արդար մրցույթի արդյունքում արժանի մասնագետներն իրենց տեղն են գտնում: Կարո՞ղ եք հատկապես Երեւան քաղաքի որեւէ մեկ դեպք նշել, որ հիվանդանոցում վիրաբույժ կամ գինելկոլոգ ընդունված լինի մրցույթով: Ամեն տարի տասնյակներով բժիշկներ են ընդունվում աշխատանքի եւ միշտ ծանոթով, կաշառքով, «վերեւի» զանգերով, ինչի հետեւանքով արժանիները հայտնվում են դրսում: 20 տարի է արդեն, որ հարցը բարձրացվում է մեր կողմից տարբեր ատյաններում, ու միշտ նույն պատասխանն է. «Օրենքը չի պարտադրում մրցույթի անցկացում»: Այսպիսով, համատարած ձեւով ոտնահարվում են հազարավոր բժիշկների, ուսուցիչների իրավունքները (մասնավորապես ազատ աշխատատեղի մասին ինֆորմացիա ստանալու, պետական աշխատատեղին հավասար հավակնություն ունենալու եւ այլ իրավունքներ): Արդյունքում ոչ լավագույններն են գրավում պետության կողմից վճարվող այդ տեղերը եւ շատ դեպքերում ոչ պատշաճ ծառայություն են մատուցում բնակչությանն ու հասարակությանը` այսպիսով խաթարելով նաեւ որակյալ ծառայություն ստանալու նրանց իրավունքը: Այսպես, շղթայական ձեւով խեղաթյուրվում է նաեւ լավ կրթվելու, գիտելիքով հասարակության մեջ իր տեղը գտնելու մտածելակերպը, իսկ կաշառակերությունն ավելի ամուր է արմատավորվում: Հատկանշական է մեր դիմումին Քաղծառայության ղեկավար պարոն Մանվել Բադալյանի պատասխանը: Համաձայնվելով բարձրացված հարցին` նա պատասխանել է. «Դրա համար անհրաժեշտ է հանրային ծառայողի մասին օրենք»: Գուցե մեր սերունդն այդպես էլ չարժանանա՞ այդ բախտին: Ձեր կողմից որեւէ քայլ այս ուղղությամբ կատարվե՞լ է, թե ոչ:

- Դա իրոք լուրջ խնդիր է, բայց կարող է լուծվել միայն հանրային ծառայողի մասին օրենքի ընդունումից հետո, իսկ օրենքն մշակման փուլում է:

Գագիկ Հովսեփյան, Հյուսիսային Հիլզ, Կանադա, 2007-21-07 04:05:14 , IP Code: 350ca

- Եթե չեմ սխալվում, Դուք մի անգամ մի հոդվածով մի «ոգեւորող» պատմություն էիք հեղինակել, որը նկարագրում էր երկու հայ տղաների պսակադրությունը: Բոլոր դեպքերում խնդրում եմ արհամարհեք հարցը, եթե սխալվում եմ: Չե՞ք կարծում, որ միասեռականությունը չարիք է, եւ այսօր նրանց գերակշռող մասն ընտրում է այս ապրելակերպը: Ես, դեմ լինելով ֆիզիկական բռնություններին, համենայն դեպս կարծում եմ, որ Դուք եւ Ձեր նմանները, խրախուսելով այս ապրելակերպը, հանցավոր եք ապագա սերնդի կողմնորոշման մեջ: Առանց Ձեր օգնության այն արդեն հասնում է համաճարակային չափերի:

- Առաջին անգամ եմ լսում, որ ես նման հոդված եմ գրել: Իսկ ընդհանրապես այստեղ մեր դիրքորոշումը հետեւյալն է` պետք է հանդուրժողականություն լինի միմյանց նկատմամբ: Ընդ որում, մեզ նման հարցով որեւէ դիմում դեռ չի եղել:

Սեդա Սահակյան, ԱՄՆ, 2007-21-07 00:35:49 , IP Code: 074fb

- Պարոն Հարությունյան, ես գրում եմ Հոլիվուդ քաղաքից: Տեսնելով խմբագիր Արման Բաբաջանյանին ազատ արձակող, այսպես ասած, անկախ հանձնաժողովի անդամի նկարը, այսինքն` այդ Հովհաննես Հունանյան կոչվածի, ես խիստ զայրանում եմ: 1997 թ. նա բռնեց իմ տղային տանն աշխատելու համար եւ նրանից 7 հարյուր դոլար կորզելով բաց թողեց, որից հետո մենք լքեցինք Հայաստանը: Իսկ հիմա նրա նման փոխոստիկանապե՞տը պիտի վճռի Արման Բաբաջանյանի հարցը: Նա պետք է երանի տա, որ իր որդին Արմանի նման մարդ լինի: Հովհաննես Հունանյանի նմանների պատճառով մենք գտնվում ենք այս երկրում եւ չունենք մարդու իրավունքները պաշտպանող մի անձ, որն իր դերը ճիշտ կատարի: Խնդրում եմ պատասխանեք, ե՞րբ ենք ազատվելու այս տականքներից:

- Դա, ըստ էության, հարց չէ, այլ Ձեր դիրքորոշումն է, որին հանդուրժողաբար եմ վերաբերվում:

Անահիտ Կարապետյան, Երեւան, 2007-20-07 18:00:48 IP Code: unknown

- Ինչո՞ւ Դուք մեր դատական նիստերին մեկ-մեկ չեք մասնակցում, որ տեսնեք, թե ինչ անարդարություններ են տեղի ունենում դատավորների կողմից:

- Մեկ-մեկ չէ, շատ եմ մասնակցել եւ համաձայն եմ, որ արդար դատաքննության իրավունքի տեսանկյունից մենք պրոբլեմներ ունենք, որի արտահայտությունը տեսնում ենք Ստրասբուրգի դատարանում:

Հ. Մովսիսյան , Երեւան, 2007-20-07 14:34:29 , IP Code: 904e1

- Հարգելի Հարությունյան, Հայաստանի հանրապետությունում ե՞րբ պաշտպանված կլինեն քաղաքացու իրավունքները եւ ի՞նչ հաջողությունների եք հասել Ձեր պաշտոնավարման ընթացքում։ Կանխավ շնորհակալություն:

- Այդ գործընթացն իր դրական միտումն ունի: Պատկերացում կազմելու համար ասեմ, որ միայն 2006 թ. 250 քաղաքացու խնդիր ենք լուծել:

Էմմա Ազատյան, ԱՄՆ, 2007-20-07 11:37:40 , IP Code: 074fb

- Պարոն մարդու իրավունքների պաշտպան, երեւի Դուք կցանկանաք մի բան անել այս խեղճ, ընչազուրկ ժողովրդի համար, բայց Դուք այդպիսի բան չեք կարող անել քոչարյանական իշխանության դեմ: Ձեզ ենք դիմում Գլենդեյլ քաղաքի բնակիչներս, որոնք զայրույթ են ապրում Ձեր երկրում կատարավող անօրինականություններից: Ասում եմ Ձեր երկիր, քանի որ ես այսօրվա իշխանությունների պատճառով գտնվում եմ օվկիանոսի այս ափում: Եւ միակ մարդը, որ այս օտար երկրում մեզ կապում էր մեր հայրենիքի հետ Արման Բաբաջանյանն է, որը սիրված եւ հարգված երիտասարդ է այստեղ, որը իր գրագիտությամբ չի զիջում Ձեզ: Ինչ ասեմ, այս, այսպես կոչված, անկախ հանձնաժողովը ցույց տվեց, որ այդ հանձնաժողովի անդամները` հանձինս Սամվել Վասիլյանի, Հովհաննես Հունանյանի, Ռոմիկ Հարությունյանի, Սուրեն Քրմոյանի, Ռաֆիկ Հովհաննսիյանի, համարձակություն չունեն իրենց խոսքն ասելու: Ամոթ եւ անեծք բոլորին:

- Այդ հանձնաժողովում մեր անդամը Բաբաջանյանի վաղաժամկետ ազատմանը կողմ է քվեարկել, մյուսների մասով ոչինչ չեմ կարող ասել:

Լեւոն Կարապետյան, Ժնեեւ, Շվեյցարիա, 2007-20-07 05:41:27 , IP Code: 95a61

- Հարգելի պարոն Հարությունյան, որպես մարդու իրավունքների պաշտպան արդյո՞ք նորմալ եք համարում, որ Գյումրիի բոլոր արեւածաղիկ վաճառողները գիտեն, որ քաղաքապետ Վարդան Ղուկասյանը, նրա որդին եւ իր ընկերը երբ, որ փողոցում, ժամը քանիսին քանի սպանություն են կատարել, բայց մեր իրավապահ մարմինները ոչնչից տեղյակ չեն: Քաղաքապետն ու իր որդին ամենալպիրշ արարքների հեղինակներն են քաղաքում, բայց այդ մասին միայն տեղյակ են եւ տեսնում են անծանոթները եւ ոչ երբեք իրավապահ մարմինները: Արդյոք իրավունքի եւ պետության տեսության տեսանկյունից դա չի նշանակում, որ Հայաստանում պետությունը դադարել է կատարել իր հիմնական ֆունկցիան, այն է` մարդուն մարդուց պաշտպանելը` կոնկրետ դեպքում մեզ` գյումրեցիներիս, նման վայրենի կենդանիներից պաշտպանելը, արդյոք այս պայմաններում ավելորդ չէ մարդու իրավունքներից խոսելը: Չե՞ք կարծում, որ եթե Ջոն Լոքը կամ Հոբսը տեսնեին այսօրվա մեր իշխանությունն ու Գյումրիի քաղաքապետին, որը դրա մարմնավորումն է, պարզապես շուռ կգային իրենց գերեզմանում:

- Ներկայումս Գյումրիի փոխհրաձգության բոլոր մասնակիցները կալանված են, եւ ընթանում է նախաքննություն:

- Հ. Գ. Այսօր ուսանելով արտասահմանում` ես ցանկություն չունեմ Հայաստան վերադառնալու եւ ապրելու ոչ թե ցածր աշխատավարձի համար, այլ իմ տարրական իրավունքների չպաշտպանված լինելու համար: Հավատացնում եմ, դա արտասահմանում մեծամասնության կարծիքն է: Ձեր կարծիքով ե՞րբ կարելի է Հայաստանում ակնկալել մի իրավիճակ, երբ բացահայտ «գողական-քրեական» պրոլետարիատը չի կարողանա դառնալ քաղաքապետ, պատգամավոր կամ մի օր էլ, ով գիտի, նախագահ:

- Նմանատիպ երեւույթը ոչ մի երկրի պատիվ չի բերում: Հայաստանի հանրապետությունը ճիշտ ճանապարհով է գնում:

'ԱԶԳԻ' ԿԱՅՔԷՋԻ ՀՅՈՒՐՆ Է ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆ ԱՐՄԵՆ ՀԱՐՈՒԹՅՈՒՆՅԱՆԸ

Նարեկ, Երեւան, 2007-26-07 15:53:04 , IP Code: 2f 804

ՄԵՐ ԿԱՅՔ-ԷՋԻ ՀՅՈՒՐՆ Է AXA ՖՐԱՆՍԻԱԿԱՆ ԱՊԱՀՈՎԱԳՐԱԿԱՆ ԸՆԿԵՐՈՒԹՅԱՆ ՑԵՂԱՍՊԱՆՈՒԹՅԱՆ ԶՈՀԵՐԻ ԺԱՌԱՆԳՆԵՐԻՆ ՏՐՎ ...

Դավիթ Միքայելյան, 2007-19-07 14:39:51

«ԱԶԳԻ» ԿԱՅՔԷՋԻ ՀՅՈՒՐԸ ՀՀ ԱՌԵՎՏՐԻ ԵՎ ՏՆՏԵՍԱԿԱՆ ԶԱՐԳԱՑՄԱՆ ՆԱԽԱՐԱՐԻ ՏԵՂԱԿԱԼ ԱՐԱ ՊԵՏՐՈՍՅԱՆՆ Է

Արմեն Պետրոսյան, Հայաստան, 2007-12-07 16:01:43 IP Code: unknown

«ԱԶԳ»-Ի ԿԱՅՔԷՋԻ ՀԱՐՑԵՐԻՆ ՊԱՏԱՍԽԱՆՈՒՄ Է ՀՀ ԿՐԹՈՒԹՅԱՆ ՈՒ ԳԻՏՈՒԹՅԱՆ ՆԱԽԱՐԱՐ ԼԵՎՈՆ ՄԿՐՏՉՅԱՆԸ

- Շնորհակալություն «Ազգին» նման առիթ ընձեռելու համար, որովհետեւ նման հանդիպումը հարցերի ու հարցադրումների աննախադեպ լայն հնարավություն է տալիս եւ օգտակար է նաեւ ինձ համար:

ՄԵՐ ԿԱՅՔԷՋԻ ՀՅՈՒՐԸ ՀՀ ԱԶԳԱՅԻՆ ԺՈՂՈՎԻ ՊԱՏԳԱՄԱՎՈՐ ՎԻԿՏՈՐ ԵՐՎԱՆԴԻ ԴԱԼԼԱՔՅԱՆՆ Է

Հավաքական հայ, 2007-31-05, 15:59:13

'ԱԶԳԻ' ԿԱՅՔԷՋԻ ԱՅՍ ՇԱԲԱԹՎԱ ՀՅՈՒՐԸ ԱԶԳԱՅԻՆ ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹՅԱՆ ՆԱԽԱԳԱՀ ՇԱՎԱՇ ՔՈՉԱՐՅԱՆՆ Է

ԱՈՆԱ ԱՐՇՈՒՆԵՑԻ, ԲՐՅՈՒՍԵԼ, 2007-24-05 15:59:33 , IP Code: 5a52d

ԱԶԳԱՅԻՆ ԺՈՂՈՎԻ ՆԱԽԱԳԱՀ ՏԻԳՐԱՆ ԹՈՐՈՍՅԱՆԸ ՊԱՏԱՍԽԱՆՈՒՄ Է ԸՆԹԵՐՑՈՂՆԵՐԻ ՀԱՐՑԵՐԻՆ

Շնորհակալ եմ «Ազգ»-ին` ընթերցողների հետ երկխոսության հնարավորություն ստեղծելու համար եւ ընթերցողներին` մոտ երեք տասնյակ հարցերի համար: Դրանց բազմազանությունն ու սրությունը վկայում է, որ մեր հայրենակիցները` հայրենիքում, թե Սփյուռքում, ուշադիր հետեւում են քաղաքական գործընթացներին: Հուսով եմ, որ առաջիկ ...

«ԱԶԳ»-Ի ԿԱՅՔԷՋԻ ՀԱՐՑԵՐԻՆ ՊԱՏԱՍԽԱՆՈՒՄ Է ՄԻԱՎՈՐՎԱԾ ԱՇԽԱՏԱՆՔԱՅԻՆ ԿՈՒՍԱԿՑՈՒԹՅԱՆ ՆԱԽԱԳԱՀ ԳՈՒՐԳԵՆ ԱՐՍԵՆՅԱՆ ...

Աշոտ, Երեւան

«ԱԶԳԻ» ԿԱՅՔԷՋԻ ՀՅՈՒՐԸ «ԺԱՌԱՆԳՈՒԹՅՈՒՆ» ԿՈՒՍԱԿՑՈՒԹՅԱՆ ՆԱԽԱԳԱՀ ՐԱՖՖԻ Կ. ՀՈՎՀԱՆՆԻՍՅԱՆՆ Է

Արտաշես Հովհաննիսյան, Հայաստան, Երեւան, 2007-19-04 17:40:43, IP Code:6d62a

«ԱԶԳ» ՕՐԱԹԵՐԹԻ ԿԱՅՔԷՋՈՒՄ ԱԶԳԱՅԻՆ ԺՈՂՈՎՐԴԱՎԱՐԱԿԱՆ ՄԻՈՒԹՅԱՆ ՆԱԽԱԳԱՀ ՎԱԶԳԵՆ ՄԱՆՈՒԿՅԱՆՆ Է

Շարուր Մինասյան, Բելգիա, Անտվերպեն, 2007-12-04 13։23։16

«ԱԶԳ» ՕՐԱԹԵՐԹԻ ԿԱՅՔԷՋՈՒՄ «ԲԱՐԳԱՎԱՃ ՀԱՅԱՍՏԱՆ» ԿՈՒՍԱԿՑՈՒԹՅԱՆ ՆԱԽԱԳԱՀ ԳԱԳԻԿ ԾԱՌՈՒԿՅԱՆԻՆ ՈՒՂՂՎԱԾ ՀԱՐՑԵՐ ...

Լիլիթ Վարդանյան, Երեւան

«ԱԶԳԻ» ԿԱՅՔԷՋԻ ՀՅՈՒՐՆ Է ԵՐԵՎԱՆԻ ԳԼԽԱՎՈՐ ՃԱՐՏԱՐԱՊԵՏ ՍԱՄՎԵԼ ԴԱՆԻԵԼՅԱՆԸ

Ինչպես տեղեկացրել էինք մեր ընթերցողներին, գլխավոր ճարտարապետի պատասխաններն ուշացան՝ նրա Մոսկվա մեկնելու պատճառով։ Ցավոք, վերադառնալուց հետո իրեն ուղղված 37 հարցերից նա պատասխանեց ընդամենը 8 հարցի, որի համար հայցում ենք մեր ընթերցողների ներողամտությունը։

«ԱԶԳ»-Ի ԿԱՅՔԷՋԻ ՀԱՐՑԵՐԻՆ ՊԱՏԱՍԽԱՆՈՒՄ Է «ԱԶԳԱՅԻՆ ՎԵՐԱԾՆՈՒՆԴ» ԿՈՒՍԱԿՑՈՒԹՅԱՆ ՆԱԽԱԳԱՀ ԱԼԲԵՐՏ ԲԱԶԵՅԱՆԸ