qulih balay qani ga ungat qu lalu nya sraral,ini kya na mkux ru mokan,ana ga ya qani qu treun maniq na tayal ru blaq balay niqun ru yasa qu son nha qulih balay,kahul kya qu lalu qani,kruma ga qulih tayal son nha uzi.
qryuxan na qulih balay ga kya yal na rapa qba kinhopa nya, ktu nya ga plqwi, te turu hiya ga mhebung ru mtasiq cikay. tngugan abaw ru ’bagan lga baq m’uyuk(mbazing) ru maki sa yatux llyung na mituru. smoya maki sa mtasaw na qsya’ ru sbas na llyung, yamux ru kwi maki sa qsya’ qani qu nniqun nha, yasa qu sqyanux nha..
sopaq qani ga cipok ru tapaq ktu nya, nanu yasa ktepok qu imi nya. sopaq qani uzi ga baq trngil tunux qasa wiwal abaw tapaq trngil sa babaw tunux yasa qu son nha sopaq smlalu la. kya qutux qu lawa ngaqa son nha uzi, ini piyang kpiyux uzi galun ga mngaqa la, baha mswa maki squ ska qsya ru galun mwah mhtuw m’ma ru ml’ax lga ungat suna nya la, yasa qu lawa ngaqa son nha.
sopaq qani hiya ga minnanak na qutux qulih, hi nya ga yan na cyugal hka, ktu nya ga mtapaq ru qtaqun nha maniq uzi, baha mswa ungat qu gyus nya ru m’uyuk(mbazing) sa tgan abaw ini ga ’bagan. smoya tpaq sa btunux ru maki sa sbas na qsya’, yamux ru kwi nniqun nha.
mkux qani hiya ga ini niqi bazing nya, nanu i niqun su bazing nya lga baq snquy,nanu sa sinquy tayal lga mnkux la,wiwal snkux inlungan na squliq mha.kruma ga sin’lwan nha lga aw ini natuk na mqu hazi swa snquy niqun.nxal mga maniq bazing mkux qu qutux squliq ru ini nya snyugi kya maku wal tqehun maniq baha balay sinkux qu bazing mkux qani la,maniq lozi ga yasa balay yasa baqun nya muci, talagay iyat ubuy niqun qu bazing mkux qani koxun balay wah!kahul kya qu ke mnkux qani. mkux qani ga cipok nqwaq nya, bazing nya ga ana su thkun ga ini hoqil yasa si kinmteloq.
mkux ga mtumaw cikay hi nya,m’abox ru ki’an pitu na patas qu hi nya.m’uyuk(mbazing) sa tngugan abaw ini ga ’bagan,smoya maki sa sbas na qsya’ ini ga zzik ru mtasaw na qsya’,cingay qu llamu na qulih niqun nha.
qbabang hiya ga ini piyang piyux,cyux qbangun hi nya ru labang hopa yasa qu son nha qbabang.qryuyux ru tapaq cikay qu hi nya,hopa qu tunux nya ru baq balay mstopaw sa balaw qsya’,maki sa ska ini ga kyahu cikay ru shway cikay na gong ru llyung.uyuk na qulih ga maniq squ yamux,hopa hazi lga baq maniq squ kwi,uyuk na qulih ru kbolung la.
qulih mokan qani ga zihung balay galun,babaw na sbehuy hmor ga musa skari ini ga csabu,yasa qu cingay qulih nya.kura te tunux nya ga mtumaw cikay ru te ngungu hiya ga mtapaq,babaw tunux ga ki’ an qzi ru maki ngurux qu tunux nya ungat qu kulu nya,yasa hyuci balay qu hi nya ru tnepan ga szyu nya qu kwara tunux nya,ana nya ngungu uzi ga lokah balay tboyaq ru kyapun ta na qba ga baq hmop qba,siki kinbaqan balay.siki kinbaqan balay.ru m’uyuk sa tngugan abaw ini ga ’bagan. baq tlqing sa ska qsya’ ini ga qlaq btunux qlyan ha,mhngan lga baq mhkangi nniqun nha,uyuk qulih ru kwi spyangun nha maniq.
