EKwaluseni kuMatsapha esigodzini sakaManzini kume ligcabho lemaSwati,^[1]likolishi lelidzalaladzala lakaNgwane; iNyuvesi yaseSwatini (UNESWA). Kungena uyofundza eNyuvesi liphupho lalabanyenti bantfwana bemaSwati. Ngaleso sizathu, baphatsi beNyuvesi bemukela tinkhululungwane ngetinkhulungwane teticelo tekufundza. Kute umntfwana angene afundze kulelikolishi kudzingeka kutsi lowo mntfwana aluphase ngemalengiso lulwimi wesiNgisi.

Lokubuhlungu kutsi lulwimi lwesiNgisi lungumcabo ekungenini kwebantfwana kulamanyenti ema kolishi kaNgwane. Ngekwemitsetfo yeNyuvesi yakseSwatini, umntfwana lomukelwako nguloyo lokumele abe aphase siNgisi ngalosesezingeni leliphakeme - i credithi. Lomcabo lona ubavimbele labanyenti bantfwana bemaSwati labangakakhoni kusiphasa siNgisi etifundweni tabo sasetikolweni letiphakeme.

Lokuphindze kudzabukise kutsi nalabo labasiphasile siNgisi bavunywa eNyuvesi, baphindze babe nebulukhuni ngaso lesiNgisi etifundvweni tabo. Kwalabo labakhetsa kuceceshwa kuso lesiNgisi baba nebulukhuni ngaso, ikakhulu emnyakeni wekucala wetifundvo tabo. Noma ke sebachubekela kuleminye iminyaka yabo yekufundza, emamaki abo akusiwio lajabulisako. Umuntfu uyaye atibute kutsi, njengoba labantfwana phela basiphasa siNgisi, engabe lobulukhuni bube sebuba kuphi. Ngabe yindlela lesiNgisi lesifundziswa ngayo eNyuvesi, ngabe ngulesimo salesifundvo sesiNgisi eNyuvesi, ngabe bothishela, ngabe ngibo labantfwana, noma ngabe yindlela labafundze ngayo etikolweni letiphakeme?

1. ↑Fowler, C., Smith, C., Dlamini, P., & Mahlalela, J. (2022, September). Developing institutional readiness for in-work, degree-level work-based learning in Eswatini. InProceedings of the 8th International Symposium for Engineering Education. University of Strathclyde.