ᱫᱷᱟᱹᱨᱛᱤ
ᱥᱟᱺᱜᱤᱧ ᱦᱤᱥᱟᱹᱵᱽ ᱛᱮᱫᱚ ᱟᱵᱚ ᱫᱷᱟᱹᱨᱛᱤ ᱟᱜ ᱴᱷᱟᱶ ᱫᱚ ᱛᱮᱥᱟᱨ ᱴᱷᱟᱶ ᱨᱮ ᱾ ᱱᱚᱶᱟ ᱫᱷᱟᱹᱨᱛᱤ ᱫᱚ ᱢᱤᱫ ᱮᱸᱜᱮᱞ (planet) ᱠᱟᱱᱟ, ᱱᱚᱶᱟ ᱫᱚ ᱜᱩᱞᱟᱹᱭ ᱜᱮᱭᱟ ᱾ ᱱᱚᱶᱟ ᱨᱮᱱᱟᱜ ᱮᱛᱚᱢ ᱟᱨ ᱠᱚᱧᱮ ᱯᱟᱦᱴᱟ ᱱᱟᱥᱮ ᱪᱚᱯᱚᱫ ᱜᱮᱭᱟ ᱾ ᱱᱚᱶᱟ ᱜᱩᱞᱟᱹᱭ ᱫᱷᱟᱹᱨᱛᱤ ᱫᱚ ᱟᱵᱚ ᱜᱚᱴᱟᱯᱟᱲᱟ ᱥᱚᱢᱟᱱ ᱜᱮᱵᱚᱱ ᱧᱮᱞ ᱧᱟᱢᱟ ᱾ ᱪᱮᱫᱟᱜ ᱥᱮ ᱟᱹᱰᱤ ᱢᱟᱨᱟᱝ ᱜᱮ ᱠᱷᱟᱹᱛᱤᱨ ᱟᱵᱚ ᱫᱷᱟᱹᱨᱛᱤ ᱨᱮᱱᱟᱜ ᱟᱹᱰᱤ ᱠᱟᱹᱡ ᱚᱝᱜᱚᱥ ᱵᱚᱱ ᱧᱮᱞ ᱧᱟᱢᱟ ᱾ ᱚᱱᱟᱛᱮ ᱫᱷᱟᱹᱨᱛᱤ ᱪᱮ ᱚᱛ ᱨᱮᱱᱟᱜ ᱡᱟᱦᱟᱸ ᱛᱤᱱᱟᱹᱜ ᱵᱷᱟᱜᱽ ᱟᱵᱚ ᱢᱤᱫ ᱫᱷᱟᱣ ᱛᱮᱵᱚ ᱧᱮᱞᱟ, ᱚᱱᱟ ᱫᱚ ᱥᱚᱢᱟᱱ ᱜᱮᱵᱚ ᱧᱮᱞᱟ ᱾
ᱥᱮᱫᱟᱭ ᱦᱟᱯᱲᱟᱢ ᱠᱚᱫᱚ ᱫᱷᱟᱹᱨᱛᱤ ᱥᱚᱢᱟᱱ ᱜᱮᱭᱟ ᱢᱮᱱᱛᱮ ᱠᱚ ᱵᱷᱟᱹᱵᱤ ᱞᱮᱜᱼᱟ ᱾ ᱢᱮᱱᱠᱷᱟᱱ ᱚᱱᱟ ᱛᱟᱭᱚᱢ ᱟᱹᱰᱤ ᱜᱟᱱᱥᱟᱬᱮᱥᱤᱭᱟᱹ ᱠᱚ ᱫᱟᱹᱭᱠᱟᱹ ᱮᱢ ᱠᱟᱛᱮ ᱫᱷᱟᱹᱨᱛᱤ ᱫᱚ ᱜᱩᱞᱟᱹᱭ ᱜᱮᱭᱟ ᱢᱮᱱᱛᱮ ᱠᱚ ᱞᱟᱹᱭ ᱠᱮᱜᱼᱟ ᱾ ᱚᱱᱟ ᱛᱟᱭᱚᱢᱥᱮᱨᱢᱟ ᱥᱟᱬᱮᱥᱤᱭᱟᱹ ᱠᱚ ᱥᱮᱨᱢᱟ ᱠᱷᱚᱱ ᱫᱷᱟᱹᱨᱛᱤ ᱠᱚ ᱯᱷᱚᱴᱚ ᱠᱮᱫ ᱛᱮ ᱥᱟᱹᱠᱷᱤ ᱠᱚ ᱮᱢ ᱠᱮᱜᱼᱟ ᱡᱮ ᱫᱷᱟᱹᱨᱛᱤ ᱫᱚ ᱜᱩᱞᱟᱹᱭ ᱜᱮᱭᱟ ᱾
ᱱᱤᱛ ᱫᱷᱟᱹᱵᱤᱡ ᱡᱟᱦᱟᱸ ᱵᱟᱰᱟᱭ ᱟᱠᱟᱱᱟ, ᱫᱷᱟᱹᱨᱛᱤ ᱨᱮ ᱥᱩᱢᱩᱝ ᱜᱮᱢᱟᱹᱱᱢᱤ,ᱡᱟᱱᱣᱟ, ᱡᱤᱵᱽ ᱡᱤᱭᱟᱹᱞᱤ,ᱫᱟᱨᱮ ᱱᱟᱺᱬᱤ ᱮᱢᱟᱱ ᱫᱚ ᱢᱮᱱᱟᱜᱼᱟ ᱾ ᱚᱱᱟᱛᱮ ᱱᱚᱶᱟ ᱚᱣᱟᱝᱨᱮ ᱫᱷᱟᱹᱨᱛᱤ ᱨᱮᱱᱟᱜ ᱫᱚ ᱟᱹᱰᱤ ᱢᱟᱨᱟᱝ ᱴᱷᱟᱶ ᱢᱮᱱᱟᱜᱼᱟ ᱾
ᱱᱚᱶᱟ ᱫᱷᱟᱹᱨᱛᱤ ᱨᱮᱱᱟᱜ ᱥᱤᱨᱡᱚᱱ ᱤᱫᱤ ᱠᱟᱛᱮ ᱥᱟᱬᱮᱥᱤᱭᱟᱹ ᱠᱚ ᱟᱹᱰᱤ ᱞᱮᱠᱟᱱ ᱢᱚᱱᱚᱛ ᱠᱚ ᱮᱢ ᱟᱠᱟᱜᱼᱟ ᱾ ᱡᱮᱢᱚᱱᱡᱟᱨᱢᱟᱱ ᱥᱟᱬᱮᱥᱤᱭᱟᱹ ᱠᱮᱸᱴ ᱟᱨᱯᱷᱨᱟᱱᱥ ᱥᱟᱬᱮᱥᱤᱭᱟᱹ ᱞᱟᱯᱞᱟᱥ ᱛᱤᱠᱤᱱᱟᱜ ᱢᱚᱱᱚᱛ ᱛᱮ ᱱᱚᱶᱟ ᱚᱶᱟᱝᱨᱮ ᱢᱤᱫᱴᱟᱹᱝ ᱟᱹᱰᱤ ᱢᱟᱨᱟᱝ ᱡᱩᱞᱩᱜ ᱠᱟᱱ ᱠᱮᱴᱮᱡ ᱡᱤᱱᱤᱥ ᱛᱟᱦᱮᱸ ᱠᱟᱱᱟ ᱾ ᱱᱚᱶᱟ ᱫᱚ ᱟᱹᱰᱤ ᱢᱟᱨᱟᱝ ᱟᱨ ᱟᱹᱰᱤ ᱡᱩᱨ ᱛᱮ ᱟᱹᱪᱩᱨᱚᱜ ᱠᱟᱱ ᱛᱟᱦᱮᱸᱱ ᱾ ᱟᱹᱰᱤ ᱥᱮᱨᱢᱟ ᱟᱹᱪᱩᱨ ᱛᱟᱭᱚᱢ ᱱᱚᱶᱟ ᱨᱮᱱᱟᱜ ᱵᱟᱦᱨᱮ ᱯᱟᱦᱴᱟ ᱵᱟᱹᱭ-ᱵᱟᱹᱭ ᱛᱮ ᱨᱮᱭᱟᱲ ᱮᱱᱛᱮ ᱠᱮᱴᱮᱡ ᱮᱱᱟ ᱾ ᱛᱟᱭᱚᱢ ᱚᱸᱰᱮ ᱠᱷᱚᱱ ᱚᱱᱟ ᱠᱷᱚᱱ ᱵᱷᱮᱜᱟᱨ ᱮᱱᱛᱮ ᱛᱟᱭᱚᱢ ᱵᱤᱫᱟᱹᱞ ᱢᱤᱫ ᱠᱮᱴᱮᱡ ᱚᱝᱜᱚᱥ ᱵᱮᱱᱟᱣ ᱮᱱᱟ ᱾ ᱚᱱᱟ ᱢᱟᱺᱫᱽ ᱠᱷᱚᱱ ᱫᱷᱟᱹᱨᱛᱤ ᱫᱚ ᱢᱤᱫᱴᱟᱹᱝ ᱾
ᱟᱨ ᱟᱫᱷᱟᱱ ᱥᱟᱬᱮᱥᱤᱭᱟᱹ ᱠᱚᱣᱟᱜ ᱢᱚᱱᱚᱛ ᱛᱮ ᱱᱚᱶᱟ ᱚᱣᱟᱝᱨᱮ ᱵᱟᱨᱭᱟ ᱠᱮᱴᱮᱡ ᱡᱩᱞᱩᱜ ᱰᱷᱤᱯ ᱛᱟᱦᱮᱸ ᱠᱟᱱᱟ ᱾ ᱚᱱᱠᱟ ᱚᱱᱠᱟ ᱛᱮ ᱢᱤᱫᱴᱟᱹᱝ ᱫᱚ ᱯᱚᱥᱟᱜ ᱮᱱᱛᱮ ᱠᱷᱟᱺᱰᱤᱡ ᱪᱟᱵᱟ ᱮᱱᱟ ᱾ ᱟᱨ ᱚᱱᱟ ᱴᱩᱠᱨᱟᱹ ᱠᱚ ᱦᱟᱱᱟ ᱢᱟᱬᱟᱝ ᱟᱜ ᱴᱷᱮᱱ ᱟᱹᱪᱩᱨ ᱮᱱᱟ ᱾ ᱛᱟᱭᱚᱢ ᱵᱤᱫᱟᱹᱞ ᱱᱚᱶᱟ ᱠᱚ ᱨᱮᱭᱟᱲ ᱮᱱᱛᱮ ᱢᱤ-ᱢᱤᱫᱴᱟᱹᱝ ᱠᱚ ᱵᱮᱱᱟᱣ ᱮᱱᱟ, ᱟᱵᱚ ᱫᱷᱟᱹᱨᱛᱤ ᱫᱚ ᱚᱱᱟ ᱠᱚ ᱢᱟᱺᱫᱽᱨᱮ ᱢᱤᱫᱴᱟᱹᱝ ᱾
.jpg)
