Arica è la citad la pli settentriunala dal Chile e giascha be paucs kilometers davent dal cunfin cun il Peru alPacific. La distanza cunSantiago munta a 2’051 kilometers. La citad è situada a la confluenza dals flumsRío Lluta eRío San José de Azapa.
En la citad regna in clima dadesert. Las temperaturas varieschan en la media annuala per stgars 19 °C. I na plova quasi mai. L’aua da las Andas procura dentant per parcs verds e pussibilitescha in’agricultura vasta en valladas fluvialas.
Gia enturn l’8000 a.C. e fin il 2000 a.C. viveva il pievel dalsChinchorros en la val dad Arica. A partir dal 1450 èn ilsInca emigrads en il nord dal Chile. Il 1536 èDiego de Almagro sco emprim arrivà en ils conturns dad Arica. Lucas Martínez Vegazo ha fundà Arica ils 25 d’avrigl 1541.
La fin dal 17avel tschientaner hanpirats englais smanatschà la flotta spagnola e la citad. Ils 5 da november 1680 ha il pirat englaisBartholomew Sharp attatgà la citad cun 140 umens. Ils Spagnols ha pudì defender Arica mo cun grondas sperditas. Ina segunda attatga ha gì lieu ils 9 da favrer 1681 cur ch’il piratJohn Watling ha assaglì la citad cun 92 umens. Watling sez è mort tar quest’attatga.
Ils 13 d’avust 1868 è Arica vegnì devastà enormamain dad intsunami; 300 abitants èn morts. Tar la proxima stremblida ils 9 da matg 1877 ha Arica cun tschintg morts gì dapli cletg.
Suenter las Guerras d’independenza en l’America dal Sid appartegneva Arica l’emprim al Peru. Cura ch’ins ha chattà grondas giaschaments da salpeter en ilDesert d'Atacama, èsi vegnì tar laGuerra da salpeter tranter il Peru, la Bolivia ed il Chile. Suenter ferms cumbats la damaun dals 7 da zercladur 1880 han ils Chilens pudì conquistar Arica e la fortezza sin il Morro, in spelm sur la citad, ch’era fin alura en mauns peruans.
Suenter la fin da questa guerra il 1883 è Arica vegnì integrà definitivamain en il territori chilen (tractat d'Ancón). Tuttina han las dispitas enturn Arica e la citad peruana daTacna, che sa chatta 60 kilometers pli al nord, anc cuzzà fin il 1929.
