Den Duwock sieneWuddelstöcke gaht bit 1,60 Meter deep in’e Eer un billt dor en Wuddelwarks mit wiete Twiege. Över de Eer kiekt denn twee Aarden vun Stengels rut. De een sünd sunnerSporen un weert 10 bit 50 cm hooch. De Döörmeter vun so’n Spraat langt vun 1 bit 5 mm. Rings umto sitt dor allerhand Twiege an, de staht wat liekup af. De Sporenstengels kaamt vör de annern ut’e Eer un starvt af, wenn se de Sporen utsett hefft. Se sünd bloß 5 bit 20 cm hooch (af un to bit 40 cm), sünd nich gröön, as de annern, man hellbruun un hefft keene Twiege. De Sporen-Ahr is 1 bit 4 cm lang un stump. De Sporenstengels wasst vunMäärt bit AnfangMai, de annern Stengels kaamt in’n Mai rut. De Plant hett endiploiden SatzChromosomen mit 2n= 216 Chromosomen.
Up de nöördliche Hälft vun’e Eer kaamt de Duwocken rund um denPol to vun deArktis bit hen na deMiddellannsche See vör. Se könnt up natt Seeklima un in dröög Kontinentalklima torecht kamen un sünd bit naSüüdafrika,Australien unNeeseeland hen insleept wurrn. De Planten wasst up’n Acker, an de Kant vun natte Wischen, in Gravens un Schregen. Se warrt as enWieserplant ankeken för natt un lehmig Land, wo dat Water nich aflopen kann.
In deLandweertschop weert de Duwocken as Unkruut ankeken un dor warrt mitHerbizide gegenan gahn. Man dat is unmööglich, de Duwocken schier to vernelen. Al dör en beten Eer an enLandmaschien kann he up annere Ackers insleept weern. Up en Acker is he en Alarmteken för slechten Landbo. He wiest dor up hen, dat de Grund tohopenstuukt wurrn is dör to grote Maschinen, datt dat dor nich noogHumus gifft un datt dor to minne Leven in’e Eer sitt (Mettjen). InJapan warrt de Duwock asGrööntüüch anboot.
