മട്ടാഞ്ചേരിയിൽ കളവുമുതലുകൾ എടുത്തു മറിച്ചു വിൽക്കുന്ന ആളാണ് വിഡ്ഡിയായ ബീരാൻ (വിജയരാഘവൻ) അബദ്ധവശാൻ ഒരു പോലീസുകാരനെ കൊലപ്പെടുത്തിയതിനാൽ ജയിൽ ശിക്ഷ അനുഭവിച്ച് കൊലപ്പുള്ളി എന്ന പേരും ബീരാനു ചാർത്തിക്കിട്ടുന്നു. ഉള്ളിൽ പേടിത്തൊണ്ടനാണെങ്കിലും ബീരാനെ ചുറ്റിപ്പറ്റി നിൽക്കുന്ന കുറച്ചു ചെറുപ്പക്കാർ ബീരാനെ ക്വൊട്ടേഷൻ പണിക്ക് നിർബന്ധിക്കുന്നു. ബീരാന്റെ ശിഷ്യനായ മണി (പ്രവീൺ പ്രേം) ഒരു ദിവസം പർദ്ദയിട്ട ഒരു പെൺകുട്ടിയെ ബീരന്റെ അടുക്കലേക്ക് കൊണ്ടുവരുന്നു. ആ പെൺകുട്ടി ഒരാളെ കൊല്ലാൻ ക്വൊട്ടേഷൻ ഏൽ‌പ്പിക്കാൻ വന്നതാണ്. ഫോട്ടോയും അഡ്രസ്സും അഡ്വാൻസും കൈമാറി പെൺകുട്ടി തിരിച്ചു പോയി. ഒരാളെപ്പോലും കൊല്ലാൻ ശേഷിയില്ലാത്ത ബീരാനും സംഘവും കിട്ടാൻ പോകുന്ന വലിയ തുകയോർത്ത് ക്വൊട്ടേഷൻ ഏൽക്കുന്നു. മണി തന്റെ സുഹൃത്തായ ജ്യൂസ് കടക്കാരൻ ഫ്രെഡി(ബാബുരാജ്) യോട്  വിവരം പറയുന്നു. പ്രാരാബ്ദവും ബീരാന്റെയടുത്ത് കടക്കാരനുമായ ഫ്രെഡിക്ക് എങ്ങിനെയെങ്കിലും കുറച്ച് പണം സംഘടിപ്പിച്ചേ മതിയാകു. മാത്രമല്ല, ഫ്രെഡിയുടെ സ്ഥലത്തിന്റെ ആധാരം ബീരാന്റെ കൈവശമാണ്. അത് തിരിച്ചു കിട്ടാൻ ഫ്രെഡി കൊലപാതക ദൌത്യം ഏൽക്കുന്നു.

പെൺകുട്ടി കൊടുത്ത അഡ്രസ്സിലെ ഫ്ലാറ്റിൽ മോഷണത്തിനു കയറിയതായിരുന്നു മെസ്സി (ആസിഫ് അലി) പ്രാരാബ്ദക്കാരനും അല്ലറ ചില്ലറ ജോലികളുമുള്ള മെസ്സി മോഷണത്തിനു ശ്രമിച്ചെങ്കിലും അവിടെ നിന്നും ഒന്നും ലഭിച്ചില്ല. പക്ഷെ അതിനിടയിൽ പെൺകുട്ടി(സനുഷ)യുടെ കണ്ണിൽ പെട്ടു. കില്ലറാണെന്നു പെൺകുട്ടി കരുതിയെങ്കിലും മോഷ്ടാവാണെന്ന് മനസ്സിലായപ്പോൾ പെൺകുട്ടി ശബ്ദമുണ്ടാക്കാൻ ശ്രമിച്ചു. എങ്കിലും അതിൽ നിന്നും മെസ്സി വിദഗ്ദമാ‍യി രക്ഷപ്പെടുന്നു. പക്ഷെ മെസ്സി പെൺകുട്ടിയുടെ സൌന്ദര്യത്തിൽ ആകൃഷ്ടനായിപ്പോയി. അവളെ വീണ്ടും കാണണമെന്ന് ആഗ്രഹിച്ചു.

ഇതിനിടയിൽ ഫ്രെഡി ഈ പെൺകുട്ടിയുടെ ഫ്ലാറ്റിലേക്ക് കടന്നു വരുന്നു. കില്ലറെ തിരിച്ചറിഞ്ഞ പെൺകുട്ടി മായ സ്വയം മരണപ്പെടാൻ തയ്യാറായി. പക്ഷേ, ശൂദ്ധനും വിഡ്ഡിയുമായ ഫ്രെഡി ഒരു തണ്ണിമത്തൻ ജ്യൂസ് ഉണ്ടാക്കുകയാണ് ആദ്യം ചെയ്തത്. ജ്യൂസിൽ വിഷം കലർത്തി പെൺകുട്ടിക്ക് കൊടുക്കുക എന്നതായിരുന്നു ഉദ്ദേശം. അതിനിടയിലാണ് പെൺകുട്ടിയെക്കാണാൻ മെസ്സി വീണ്ടും ഫ്ലാറ്റിൽ വരുന്നത്. മെസ്സി വരുന്നത് കണ്ട ഫ്രെഡി വാതിലിന്റെ മറവിൽ ഒളിച്ചു നിന്നു. പെൺകുട്ടിയുമായി സംസാരിച്ച് തിരികെ പോരാൻ നേരം മെസ്സി അവളുടെ രത്നങ്ങൾ പതിപ്പിച്ച വള മോഷ്ടിക്കാൻ ശ്രമിച്ചത് ഫ്രെഡി കാണുന്നു. മെസ്സിയെ ഫ്രെഡി ഭീഷണിപ്പെടുത്തി വള തിരികെ വാങ്ങുന്നു. താമസിയാതെ മെസ്സി ഫ്രെഡിയുടേ വരവിന്റെ ഉദ്ദേശവും പെൺകുട്ടി മായയുടെ മരിക്കാനുള്ള ആഗ്രഹവും മനസ്സിലാക്കുന്നു. അതിന്റെ കാരണങ്ങൾ അറിഞ്ഞ് മൂവരും കൊലപാതക പദ്ധതിക്കായി ഫ്ലാറ്റിൽ നിന്നും പുറത്തിറങ്ങുന്നു.

റോഡിലെ പോ‍ലീസ് പട്രോളിങ്ങ് കാരണം മൂവരും ഒരു ഓട്ടോറിക്ഷറിയിൽ മട്ടാഞ്ചേരി പാലത്തിലേക്ക് പോകുന്നു. പാലത്തിന്റെ കൈവരിയിൽ പെൺകുട്ടിയെ ഇരുത്തി ഫ്രെഡി പ്ലാൻ പറയുന്നു. പെൺകുട്ടിക്ക് ഉറക്കഗുളിക കൊടുത്ത് കൈവരിയിൽ ഇരുത്തും. മയങ്ങി പെൺകുട്ടി കായലിൽ വീഴും എന്ന ആശയം മെസ്സിക്ക് ഇഷ്ടപ്പെടുന്നില്ല. പെൺകുട്ടിയോട് ഇഷ്ടം തോന്നിയ മെസ്സി ഇതിനു സമ്മതിക്കുന്നില്ല. ഫ്രെഡിയുടേയും മെസ്സിയുടേയും വാക്കുതർക്കത്തിലും പിടിവലിയിലും ഇരുവരുടേയും കൈതട്ടി പെൺകുട്ടി പാലത്തിൽ നിന്നും കായലിലേക്ക് വീഴുന്നു.

അറിയാതെ പറ്റിയ അബദ്ധത്തിൽ ഇരുവരും എന്തുചെയ്യണമെന്നറിയാതെ പാലത്തിലിരിക്കുന്നു.