Chukai nya chaj tauka levi wang mandatori ti diengkah gerempung perintah ngagai individu tauka entiti undang-undang dikena nyukung belanja perintah enggau belanja rama begulai tauka dikena ngatur sereta ngurangka eksternaliti negatif.[1]Pematut chukai nunjukka pengawa polisi enggau ulah individu ti betuju nentuka pemayar chukai mayar penyampau chukai ti patut ba maya ti patut sereta ngulihka elawin chukai enggau pengelepas chukai ti betul. Pengawa chukai ti keterubah ditemu nyadi ba menua Mesir Kuno urung taun 3000–2800 SK.[2] Chukai tu datai ari chukai terus tauka enda terus lalu tau dibayar ngena duit tauka sebaka enggau pengereja pengawa.
Semua menua bisi sistem chukai dikena mayar utai ti diguna mensia mayuh, bala gerempung, tauka utai ti dipesetuju menua sereta ungkup pengawa perintah. Sekeda menua ngengkahka tikas peratus chukai ti tetap ba penatai pemisi ninting taun diri empu, tang mayuh chukai skala nya progresif bepelasarka kurung penyampau penatai pemisi ninting taun. Tebal agi menua ngechaj chukai ba penatai pemisi individu enggau penatai pemisi korporat . Menua tauka sub-unit mega suah neritka chukai pengaya, chukai pesaka, chukai pemeri, chukai reta tengkira, chukai jual, chukai guna, chukai rampa menua, chukai gaji, duti, taukatarif. Iya mega ulih ngambi chukai ba chukai, baka enggau chukai penerima kasar.
Dalam jaku ekonomi (alir pemisi besimbak), chukai mindahka pengaya ari ruang bilik tauka dagang ngagai perintah. Tu bisi kuing ngagai penumbuh ekonomi enggau pengelantang, ti tau ditambah (dikelala enggau nama penganda fiscal) tauka dikurangka (dikelala enggau nama beban chukai ti lebih). Berindik ari nya, chukai nyadi topik ti balat dipejuraika sekeda orang, laban taja pan chukai dikumbai beguna nengah konsensus ngambika mensia mayuh ulih befungsyen sereta mansang enggau chara ti teratur sereta adil nengah pengawa perintah ti nyendiaka barang mensia mayuh enggau servis mensia mayuh,[3][4][5][6] ke bukai baka libertarian nya enda sejaku pasal chukai lalu ngutuk chukai enggau luas tauka sepenuh iya, ngeklasifikasyenka chukai nyadi enchuri tauka ngulihka duit nengah chara mejal begulai enggau ngena kuasa.[7] Dalam ekonomi makit, chukai dikumbai nyadi pilih ti pemadu manah dikena bejalaika perintah (nganti ngempu nengeri ti ngerembai ba chara ngasilka), laban chukai ngasuh perintah ulih mansutka asil enggau enda balat ngachau makit enggau dagang peribit; chukai ngetanka efisyen enggau produktiviti sektor peribit nengah chara ngemendarka individu enggau kompeni ngaga pemutus ekonomi sida empu, ngaul diri dalam pengawa ngasilka ti fleksibel, pekit, enggau inovasyen asil ari kuasa makit.
Sekeda menua (suah iya mit ba saiz tauka penyampau tubuh, ti ngujungka infrastruktur enggau belanja rama mit agi) befungsyen nyadika palan chukai ke engkeman nengah chara neritka chukai ti minimum ba penatai pemisi diri empu enggau penatai pemisi korporat. Palan chukai tu narit puku ari menua luar (kelebih agi ari ekonomi ti besai agi) seraya ngujungka pengelenyau asil chukai dalam menua bukai ti ukai palan (nengah pengerusak pengkalan enggau ngalihka penguntung).
