Jan Laras (němsceHans Laras; *12. nowembra1845 wLejnje, †6. oktobra1921 wJablunkovje) běserbski pedagog a spisowaćel, profesor w čěskej Šleskej a přełožer psalmow.
Narodźi so jako syn Lejnjanskeho žiwnosćerja a bě wot 1861 hač do 1870 chowancSerbskeho seminara wPraze, hdźež wopytowaše hač do lěta 1867 němskorěčny Małostronski gymnazij. Wot 1867 do 1870 studowaše teologiju a filozofiju. Přestawši studować sta so přez posrědkowanje přiwuznych z domjacym wučerjom pola hrabje Larischa w Prostřednej Suchej a pozdźišo w Karvínje aĆěšinje w čěskej Šleskej. Tam załoži w lěće 1889 hólči pensionat a žiwješe so jako priwatny wučer. Za časPrěnjeje swětoweje wójny přesydli so k dźowce do Jablunkova.
Laras bě sobustaw Praskeho serbskeho towarstwaSerbowki a wot 1868 do 1870 jeho starši. DoKwětkow podawaše basnje a nastawki. Přełoži zhebrejšćinyPsalmy, kotrež wuńdźechu 1872 wBudyšinje. Jako wučer w Ćěšinje wuda pedagogisku přiručkuDer Hofmeister (Teschen 1876) a didaktiske powědančkoVater Niklas (1907), kotrež wuńdźe 1911 w serbskim přełožku jakoŠibakec nan. W reportažiKamjenjo-wuhlowe podkopki pod Karpatami (Łužica 1883) zaběraše so ze socialnej problematiku podkarpatskeje industrijoweje krajiny.
W Ćěšinje skutkowaše nimo toho jako spěwar a dirigent we wuměłskich towarstwach Čechow a Polakow. Krótko do swojeje smjerće wotkazaMaćicy Serbskej, kotrejež čłon bě hižo wot 1864, wulki dźěl swojeho zamóženja.
