فارس ٚ اۊستان، ایته جهايران ٚاۊستانان ایسه گهايران ٚنسا نهأ. أ اۊستان ۱۲۲,۶۰۸ کيلۊمتر مۊربع پيلئکي أمرأ، ايران ٚ چارؤمي پيله اۊستان ؤ ۵,۰۵۴,۷۰۰ نفر جمعيت ٚ أمرأ (۱۴۰۰ شمسي سال، ايران ٚ آمار ٚ مرکز ٚ جمعيتي برآورد ٚ أساس)، ايران ٚ چارؤمي پۊرجمعيت ٚ اۊستان محسۊب به. ۱۴۰۲ شمسي سال ٚ کيشۊري تخسيمان ٚ أساس، فارس ٚ اۊستان ۳۷ شأرستان، ۹۷ بخش، ؤ ۱۲۴ شأر دأشتي. فارس ٚ اۊستان ٚ مرکز،شيراز ایسه گه ويشترين جمعيت-أ أ اۊستان ٚ مئن دأره ؤ کيشۊر ٚ پنجؤمي پۊرجمعيت ٚ شأر محسۊب به. شيراز ٚ پسي،مرودشت،جهرم ؤفسا شأران، ترتيب ٚ أمرأ أ اۊستان ٚ پيله شأران ایسد ؤ هرته ويشتر جه ۱۰۰ هيزار نفر جمعيت دأرده. أ اۊستان ٚ مۊهم ٚ ايقتصادي منابع، کيشاورزي ؤ دامداري، مۊختلف صنعتي شأرکان، پالايشگاهان، پترؤشيمي صنعتان، ؤ مۊختلف نيرۊگاهان ايسده. فارس ٚ اۊستان ٚ آو ؤ هوا متنوع ايسه ؤ سه نؤع کۊهستاني، معتدل، ؤ گرم ٚ مئن تخسيم به. فارس ٚ اۊستان، خۊ فرهنگي، تاريخي، طبيعي، ؤ مذهبي جاذبه‌ئن ٚ أمرأ، ايته جه ايران ٚ مۊهم تۊريستي مرکزان ایسه. هأتؤني، اي سري جه ايران ٚ مۊهم دانشگاهي مرکزان ني فارس ٚ اۊستان ٚ مئن نهأده.
