Hipatia (en griegu antiguu: Ὑπᾰτία i en latín: Hypatia;Alejandría, entri el 455 i el 470-marçu de 515 o 516) hue una filósofa i maestra neoplatónica griega, oriunda d'Egitu que destacó enos campus delas matemáticas i l'astronomía, biembru i cabeça dela Escuela neoplatónica d'Alejandría a prencipius del sigru v. Seguiora dePlotinu, cautivó los estudius lógicus i las cencias essatas, llevandu una vida ascética. Educó a una seleta escuela d'aristócratas cristianus i paganus que acuparun altus cargus, entri los que sobresalin l'obispu Sinesiu de Cireni —que mantuvu una importanti correspondencia con ella—, Hesiquiu d'Alejandría i Orestis, prefetu d'Egitu nel momentu dela su muerti.
Ija i discípula del astrónomu Teón, Hipatia hue una delas primeras mugeris matemáticas dela estoria.[1] Escrevió a tentu dela geometría, álgebra i astronomía, mejoró l'inseñu delos primitivus astrolabius —estrumentus pa determinal las posicionis delas estrellas sobri la bóveda celesti— e inventó un densímetru, por ellu está considerá comu una pionera ena estoria delas mugeris ena cencia.[2]
Hipatia hue assessiná por una trupi decristianus. La motivación delos assessinus i los sus atijus cona autoridá eclesiástica, á síu ojetu de munchus debatis. L'assessinatu ocurrió nun contestu de tensionis i briegas entri el cultu cristianu i el restu de religionis, contra l'escaecíupaganismu, amás delos conflitus entri las destintas facionis dela Igresia, el patriarcau alejandrinu i el poel imperial, representau n'Egitu pol prefetu Orestis, antiguu alunu dela filósofa.Sócrati Escolásticu, l'estoriaol más cercanu alos hechus, afirma que la muerti de Hipatia hue causa de «no pocu oprobiu» pal patriarca Cirilu i la igresia d'Alejandría,[3] i huentis posterioris, paganas i cristianas, l'acusan del crimi, polo que munchus estoriaoris consideran probabli l'empricación de Cirilu, enque'l debati acontina abiertu.
