El gordu y el flacu foi un dúu cómicu formáu polos actoresStan Laurel yOliver Hardy, qu'apaeció en numberosespelícules mudes y más tarde tamién falaes, y qu'algamó gran popularidá na primera metá delSieglu XX. Son consideraos como una de les pareyes d'actores cómicos más importantes na historia del cine.
El primer alcuentru n'escena de los dos cómicos tuvo llugar en1917 enThe Lucky Dog. Depués vino una dómina na qu'apaecieron por separtao en dellos curtios nos años venti. Dellos años más tarde, los cómicos apaecieron nes producciones deHal Roach: La so primera películaoficial xuntos foiThe Second Hundred Years (xunu de1927), dirixida porFred Guiol y supervisada porLeo McCarey, que foi'l qu'encamentó que los personaxes creaos tuvieren continuidá, y d'esta miente la pareya tuvo trabayando ente 1927 y1940, protagonizando 62 curtios y 13 películes (amás de numberosos cameos n'otres películes). Esto foi asina magar el fechu de que Laurel tuvo naguando por asonsañar l'ésitu del so contemporaneuCharlie Chaplin, como artista en solitario, inclinóse finalmente a les presiones del estudiu pa formar un dúu con un emplegáu de la casa, Oliver 'Babe' Hardy.
Los curtios que ficieron depués son de lo meyor de la so producción. En1931 entamaron colos llargometraxes, gracies a los qu'algamaron sonadía mundial. Ente les sos películes más populares y de mayor popularidá atopamosSons of the Desert (1933),Way Out West (1937), yBlock-Heads (1938); y los curtiosHog Wild (1930),Helpmates (1932), y la que recibió'l premiu de l'Academia,The Music Box (1932).
En1939 separtáronse y Hardy protagonizóZenobia, conHarry Langdon, y fizo dellos papeles secundarios en películes deWaggner yFrank Capra. Unos meses depués volvió a xuntase con Stan Laurel, apaeciendo en comedies de la20th Century Fox yMetro Goldwyn Mayer hasta1944, cuando se retiren pa concentrase nes sos obres teatrales. En1952 realizaron una postrer película enFrancia,Atoll K, enantes de retirase dafechu del cine. Depués dedicáronse más al teatru y a la televisión.
Hardy foi un cómicu de menos recursos que Stan Laurel, pero aportó los sos conocimientos de la escuela d'Estaos Xuníos deSennett yRoach, basada na improvisación y el gag.
La so sonadía espardióse per numberosos países, colo que les sos películes doblábense a varios idiomes (fueron unes de les primeres películes doblaes); meticulosos, ellos mesmos les doblaben, lo que fai que podamos oyelos en castellanu coles sos voces verdaderes.
Stan Laurel (el Flacu), de nome verdaderu Arthur Stanley Jefferson, nació'l16 de xunu de1890 n'Ulverston, enLancashire, y morrió'l23 de febreru de1965 enSanta Monica,California, entama la so carrera musical n'Escocia. Instálase nosEstaos Xuníos en1910 y fizo la so primera apaición n'escena en1917 enNuts in May. Participó nuna cincuentena de películes mudes enantes de formar pareya con Hardy.
Oliver Hardy (el Gordu), de nome verdaderu Norvell Hardy, nació'l18 de xineru de1892 en Harlem,Georgia, y morrió d'una trombosis cerebral el7 d'agostu de1957 enHollywood,California, debutó en1914 na películaOutwitting Dad. Interpreta a personaxes dañibles al entamu de la so carrera y apaeció en más de doscientes películes mudes enantes de constituyir el famosu dúu. Trabayando nun teatru d'Inglaterra, Hardy padeció unaneumonía y en setiembre de1956 dio-y un ataque d'apoplexía que lu paralizó hasta la so muerte, ocurrida cuasi un añu depués (el7 d'agostu de1957).
La llegada del cine sonoru obligó a los estudios cinematográficos a adaptase a los nuevos tiempos, faciendo versiones de les películes en diferentes llingües. P'algamar esti obxetivu recurrieron a laimportación d'actores.
Unu d'esos actores yera l'artistaavilesínLuis Julio Llaneza Iglesias (1877 -1956) que nos años 20 delsieglu XX atopábase enNueva York, depués de tener triunfao enL'Habana. Ellí foi a buscalu la Casa Pathé pa doblar películes al castellanu y foi esta mesma empresa la que lu llevó aHollywood. Hal Roach contratólu pa trabayar al llau d'Oliver Hardy y Stan Laurel.
Nel añu1931 participó con estos cómicos na versión hispana de la películaLos Calaveras. Nella participa nuna conversación telefónica con Oliver Hardy y ésti llega a llamalu pol so apellíu: Llaneza.
La películaLos Calaveras foi proyectada polaFilmoteca d'Asturies el día26 de mayu de1998, dientro del ciclu "Europa-América: Hollywood, a la vista".
Wikimedia Commons acueye conteníu multimedia sobre Laurel y Hardy.| Control d'autoridaes |
|
|---|
Datos:Q33497 Multimedia:Laurel and Hardy