Suid-Korea (Koreaans: 한국, Hanja: 韓國,Hanguk), amptelik dieRepubliek Korea (Koreaans: 대한민국, Hanja: 大韓民國,Daehanminguk,luister(hulp·inligting), letterlik: "Groot Han-Republiek" of "Groot Koreaanse Republiek"), is 'ngrondwetlikerepubliek inOos-Asië wat die suidelike helfte van dieKoreaanse Skiereiland en eilande langs die kus beslaan.Jeju, die grootste eiland, is ongeveer 82 km suid van die vasteland af geleë. Die land word in die noorde begrens deur die Demokratiese Volksrepubliek Korea (Noord-Korea), in die ooste deur dieSee van Japan (wat in Suid-Korea egter Oossee genoem word), dieOos-Chinese See in die suide en dieGeelsee in die weste. Die land word in die suidooste deur dieStraat van Korea van dieJapannese eiland Tsushima geskei. DieVolksrepubliek China is oorkant die Geelsee geleë.

Diehoofstad en grootste metropolitaanse gebied isSeoel aan die Hanrivier waar byna die helfte van die Suid-Koreaanse bevolking saamgetrek is. Seoel is die ekonomiese spilpunt van dié land en het sentraal gestaan in die sogenoemde "Wonder aan die Hanrivier", die vinnige industrialisering en verstedeliking van Suid-Korea ná dieKorea-oorlog (1950–1953) wat van die republiek – oorspronklik 'n arm agrariese samelewing – binne enkele dekades een van die vernaamste en tegnologies gevorderdste nywerheidslande ter wêreld gemaak het. Multinasionale ondernemings en konglomerate soosSamsung,LG,Hyundai enKia het in globale rolspelers ontwikkel.

Suid-Korea het, net soos sy buurland Japan, 'n etnies uiters homogene bevolking van meer as 52 miljoen.Koreane se nasionale identiteit en selfbeskouing as lotgemeenskap spruit voort uit hierdie eendersheid en 'n geskiedenis as 'nonafhanklike land wat tot in die 7de eeu n.C. terugstrek. So word die politieke verdeling van Korea ná dieTweede Wêreldoorlog volgens 'n ooreenkoms tussen dieVerenigde State en dieSowjetunie steeds as 'n traumatiese en smartvolle gebeurtenis ervaar. Die stigting van Suid-Korea in 1948 is voorafgegaan deur die Japannese besetting van Korea van 1910 af.

Nadat diekommunistiese Noord-Korea op 25 Junie 1950 die suide binnegeval het, het die Korea-oorlog as internasionale konflik, waarby ookSuid-Afrika militêr betrokke was, drie jaar lank op die skiereiland gewoed. Die oorlogshandelinge is in 1953 met 'nwapenstilstandsooreenkoms beëindig waarvolgens Noord- en Suid-Korea deur 'n gedemilitariseerde sone met 'n wydte van vier kilometer van mekaar geskei word. Dié sone, wat oor 'n afstand van 240 km loop en ongeveer die 38ste noordelike breedtegraad vanaf die monding van die Hanrivier aan die weskus van die Koreaanse Skiereiland tot 'n punt aan die ooskus, net suid van die Noord-Koreaanse nedersetting Kosŏng, volg, kom grootliks ooreen met die wapenstilstandslyn van 1953. Sedert republiekwording het Suid-Korea vyf grootgrondwetlike veranderinge ondergaan wat dié land van outokrasieë en militêre diktature tot 'n volwaardige veelpartydemokrasie gelei het.

...lees verder

• Italië enNederland bespreek die Europese kwalifiseringsplekke vir dieT20I-wêreldbeker 2026 inIndië enSri Lanka;Hongkong kwalifiseer vir die eerste keer vir 'nrugbywêreldbekertoernooi en word die tweedeAsiatiese span wat aan dieRugbywêreldbeker 2027 inAustralië sal deelneem.
• Denemarke neem die voorsitterskap van dieEuropese Unie byPole oor.
• Suid-Afrika verslaanAustralië met vyf paaltjies in die eindstryd van diederde Wêreldtoetskampioenskap opLord’s; voor die eindstryd is onder andereHashim Amla enGraeme Smith in die IKR se Heldesaal opgeneem.
• Pous Leo XIV: Die 69-jarige kardinaal-Diaken van Santa Monica, Robert Francis Prevost, is die eersteAmerikaner enPeruaan wat tot hoof van dieRooms-Katolieke Kerk verkies word.
• Friedrich Merz is ingehuldig asbondskanselier van Duitsland en volgOlaf Scholz op.

... datEllen Johnson-Sirleaf die eerste vroulike president van 'nAfrika-land is? Sy is as president vanLiberië ingehuldig op16 Januarie2006. Op9 November2011 is sy vir 'n tweede ampstermyn gekies.

... datHelsinki, die hoofstad vanFinland, tot teen die einde van die19de eeu 'n oorwegendSweedstalige stad was? Vandag is Helsinki 'n tweetalige stad en praat 6,2% van sy inwoners Sweeds en 88%Fins.

... datKeulen inDuitsland naas dieFranse stadBordeaux in die13de eeu die grootste uitvoerhawe vir wyn was?Engeland was een van die vernaamste bestemmings. Vandag is die stad beter bekend vir sy bier, Kölsch, wat ook die naam van die plaaslike dialek is.

... datTafelberg die enigste aardkenmerk is waaraan 'nsterrebeeld se naam ontleen is?Mensa, wat "tafel" beteken, is 'nsterrebeeld van dieSuidelike Halfrond wat taamlik laat afgebaken is en dus geen antiekemitologie het nie.

... dat dieKaap Agulhasvuurtoring byKaap Agulhas wat op1 Maart1849 in gebruik geneem is, gebou is volgens die model van diePharos van Alexandrië, een van dieSewe wonders van die antieke wêreld?

15 Julie:

• 1606 – Die skilderRembrandt van Rijn word inLeiden,Nederland, gebore.
• 1799 –Franse soldate ontdek dieRosettasteen op die dorpie Rasjid inEgipte seNyldelta.
• 1916 – DieBoeing-maatskappy word inSeattle,Verenigde State, gestig.
• 1997 – DieItaliaanse modeontwerperGianni Versace word voor sy huis inMiami doodgeskiet.
• 1999 – DieVolksrepubliek China verklaar dat hy oor die nodige tegnologie beskik om 'nneutronbom te vervaardig.